નવી દિલ્હી : ટેક્નોલોજી ક્ષેત્રે એક અદ્ભુત ક્રાંતિ સર્જતા ગૂગલે અવકાશમાં ભ્રમણકક્ષામાં ફરતા ઉપગ્રહ પર આર્ટિફિશિયલ ઇન્ટેલિજન્સ (AI) મોડેલને સફળતાપૂર્વક ચલાવીને પૃથ્વી પર તેનો પ્રથમ સંપૂર્ણ પ્રતિભાવ પાછો મેળવવામાં મોટી સફળતા હાંસલ કરી છે.

પ્રાપ્ત વિગતો અનુસાર, ગૂગલના સીઈઓ સુંદર પિચાઈએ સોશિયલ મીડિયા પર આ ઐતિહાસિક વિકાસની જાહેરાત કરતા જણાવ્યું હતું કે પ્રોટોટાઇપ ઉપગ્રહ પર ટેન્સર પ્રોસેસિંગ યુનિટ (TPU) ને બુટ કરીને નોર્વેના સ્વાલબાર્ડ પરથી પસાર થતી વખતે ઓનબોર્ડ જેમ્મા ઓપન મોડેલને અવકાશ વિશે હાઈકુ જનરેટ કરવા માટેનો પ્રોમ્પ્ટ મોકલવામાં આવ્યો હતો, જેનો સચોટ જવાબ ઉપગ્રહે પૃથ્વી પર મોકલી આપ્યો હતો.

ઘટનાની વિગતવાર માહિતી આપતા અહેવાલોમાં જણાવવામાં આવ્યું છે કે કંપનીના આ મહત્વાકાંક્ષી 'પ્રોજેક્ટ સનકેચર' હેઠળ નીચા પૃથ્વી ભ્રમણકક્ષામાં ઉપગ્રહો પૃથ્વી કરતાં આઠ ગણી વધુ સૌર ઉર્જા ઉત્પન્ન કરી શકે છે કે નહીં અને અવકાશના કઠોર વાતાવરણમાં એઆઈ વર્કલોડને વિશ્વસનીય રીતે હેન્ડલ કરી શકે છે કે નહીં તેની ચકાસણી કરવામાં આવી રહી છે.

આગામી તબક્કામાં ઉપગ્રહ પર થર્મલ સ્ટ્રેસ અને રેડિયેશન એક્સપોઝરની અસરોનું પરીક્ષણ કરવામાં આવશે, જ્યારે વર્ષ ૨૦૨૭ સુધીમાં બે એકબીજા સાથે જોડાયેલા ઉપગ્રહોનું પરીક્ષણ કરવાનું મોટું લક્ષ્ય રાખવામાં આવ્યું છે.

ગૂગલની આ અત્યાધુનિક પહેલ ભવિષ્યમાં અવકાશ આધારિત કમ્પ્યુટિંગ અને આર્ટિફિશિયલ ઇન્ટેલિજન્સ ક્ષેત્રે સીમાચિહ્નરૂપ સાબિત થશે તેવી પૂરી સંભાવના છે.

આગામી સમયમાં આ ટેક્નોલોજીના વધુ વિકાસથી વૈશ્વિક સ્તરે ડેટા પ્રોસેસિંગ અને સેટેલાઇટ સંચાર ક્ષેત્રે અભૂતપૂર્વ પરિવર્તનો જોવા મળશે.