મુંબઈ : શિવસેના (ઉદ્ધવ બાળાસાહેબ ઠાકરે)ના વડા ઉદ્ધવ ઠાકરેએ ભાજપના નેતૃત્વવાળી કેન્દ્ર સરકાર પર લોકોના મતદાન અને વિરોધ પ્રદર્શન કરવાના અધિકારોને અસર કરવાનો આરોપ લગાવ્યો છે. તેમણે જણાવ્યું કે જો સરકાર નાગરિકો પાસેથી મત અને વિરોધ દ્વારા પોતાનો અભિપ્રાય વ્યક્ત કરવાનો અધિકાર છીનવવાનો પ્રયાસ કરતી હોય તો આવી સત્તાને બદલવાની જરૂર છે.

 

અખિલ ભારતીય મરાઠી પત્રકાર પરિષદના એક કાર્યક્રમને સંબોધતાં ઠાકરેએ વરિષ્ઠ વકીલ પ્રશાંત ભૂષણ દ્વારા કરવામાં આવેલી ‘રિજીમ ચેન્જ’ એટલે કે સત્તા પરિવર્તનની હાકલને સમર્થન આપ્યું હતું. તેમણે કહ્યું કે લોકશાહી અધિકારો પર મૂકવામાં આવતા કોઈપણ અંકુશનો વિપક્ષ એક થઈને વિરોધ કરશે. 

 

દિલ્હીની પોલીસ કાર્યવાહી પર ઉઠાવ્યા સવાલ

 

ઠાકરેએ દિલ્હીમાં CJP અને અન્ય સંગઠનોના વિરોધ પ્રદર્શન દરમિયાન પોલીસ દ્વારા કથિત બળપ્રયોગનો ઉલ્લેખ કર્યો હતો. તેમણે આરોપ લગાવ્યો કે પોલીસ યુવાનો અને મહિલાઓ સાથે મારપીટ કરી રહી છે અને આવા દમન સામે અવાજ ઉઠાવવો જરૂરી છે.

 

દિલ્હીમાં મોટી સંખ્યામાં પોલીસ કર્મચારીઓ તહેનાત કરવા અંગે કટાક્ષ કરતાં ઠાકરેએ પૂછ્યું હતું કે શું હજારો પોલીસ કર્મચારીઓને ‘દાંડિયા રમવા માટે’ બોલાવવામાં આવ્યા છે? આ ટિપ્પણી દ્વારા તેમણે દેખાવકારો સામે લાઠીઓના કથિત ઉપયોગ અંગે સરકારને નિશાન બનાવી હતી. 

 

‘લોકશાહીમાં સરકાર બદલવાની માગ ગુનો નથી’

 

પ્રશાંત ભૂષણે અગાઉ જણાવ્યું હતું કે લોકશાહીમાં સત્તા પરિવર્તનની માગ કરવી નાગરિકોનો અધિકાર છે અને સરકાર પ્રત્યે અસંતોષ વ્યક્ત કરવો ગુનો નથી. તેમણે દાવો કર્યો હતો કે હાલની લડાઈ ચૂંટણી પ્રક્રિયા અને લોકશાહીની સુરક્ષા માટે છે. જોકે ભાજપે તેમના નિવેદનનો વિરોધ કરીને વિપક્ષ પર અરાજકતા ફેલાવવાનો આરોપ મૂક્યો હતો. 

 

કોકરોચના પૂતળાને લઈને ભાજપ પર કટાક્ષ

 

દિલ્હીની એક રામલીલામાં રાવણની સાથે કોકરોચનું પૂતળું બાળવાની તૈયારીનો ઉલ્લેખ કરતાં ઠાકરેએ ભાજપ પર કટાક્ષ કર્યો હતો. તેમણે કહ્યું કે પોતે ભગવાન રામને લાવ્યાનો દાવો કરનારા લોકો હવે કોકરોચથી ડરી રહ્યા છે.

 

ઠાકરેએ કહ્યું કે વિપક્ષ લોકશાહી પદ્ધતિથી પરિવર્તન લાવવા માટે એકજૂટ છે અને લોકોના મતાધિકાર તેમજ શાંતિપૂર્ણ વિરોધના અધિકારની રક્ષા માટે લડત ચાલુ રહેશે.