<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Tuesday, 17th November 2026

રાજસ્થાનની મેડિકલ કોલેજોમાં રેગિંગના વધતા બનાવો સામે સરકારની લાલ આંખ: બારમેરમાં ૮૦ અને જોધપુરમાં ૧૯ વિદ્યાર્થીઓ સસ્પેન્ડ

તબીબી અને આરોગ્ય મંત્રીએ તમામ સંસ્થાઓને ઝીરો-ટોલરન્સ નીતિના કડક અમલ અને બેદરકારી દાખવનાર કોલેજ સત્તાવાળાઓ સામે પણ શિક્ષાત્મક કાર્યવાહીની ચેતવણી આપી છે.

જયપુર : રાજસ્થાનની વિવિધ સરકારી અને ખાનગી મેડિકલ કોલેજોમાં પ્રથમ વર્ષના વિદ્યાર્થીઓ સાથે રેગિંગ અને માનસિક ઉત્પીડનની વધતી જતી ફરિયાદોને ગંભીરતાથી લઈને રાજ્ય સરકારે મંગળવારે કડક કાર્યવાહી હાથ ધરી છે, જે અંતર્ગત બારમેર મેડિકલ કોલેજના ૮૦ અને જોધપુરની ડૉ. એસ.એન. મેડિકલ કોલેજના ૧૯ વિદ્યાર્થીઓ સામે સસ્પેન્શન સહિતના શિસ્તભંગના પગલાં લેવામાં આવ્યા છે.

 

ઓક્ટોબર અને નવેમ્બર મહિના દરમિયાન રાજ્યની સાતથી વધુ મેડિકલ કોલેજોમાંથી નવા વિદ્યાર્થીઓને હેરાન કરવાની ફરિયાદો નેશનલ મેડિકલ કમિશન અને આરોગ્ય વિભાગ સુધી પહોંચી હતી, જેમાં પાલી, કોટા, બીકાનેર, ભીલવાડા અને બાંસવાડાની સંસ્થાઓનો પણ સમાવેશ થાય છે.

 

રાજ્યના તબીબી અને આરોગ્ય મંત્રી ગજેન્દ્ર સિંહ ખિમસરે તમામ કોલેજોને ઝીરો-ટોલરન્સ નીતિનું ચુસ્ત પાલન કરવાનો આદેશ આપતા જણાવ્યું હતું કે તબીબી કોલેજો શિક્ષણ અને મૂલ્યોનું જતન કરવા માટે છે અને ત્યાં વિદ્યાર્થીઓને ભયમુક્ત વાતાવરણ પૂરું પાડવું એ વહીવટીતંત્રની પ્રાથમિક જવાબદારી છે.

 

મંત્રીએ સ્પષ્ટ ચેતવણી આપી છે કે ભવિષ્યમાં જો રેગિંગની કોઈ ઘટના બનશે અને તેમાં કોલેજ વહીવટીતંત્ર કે અધિકારીઓની બેદરકારી જણાશે તો દોષિત વિદ્યાર્થીઓની સાથે સંસ્થાકીય સત્તાવાળાઓ સામે પણ કડક શિક્ષાત્મક કાર્યવાહી કરવામાં આવશે.

 

આ ઉપરાંત ફરિયાદ કરનાર પીડિત વિદ્યાર્થીઓ અને તેમના પરિવારની ઓળખ સંપૂર્ણપણે ગુપ્ત રાખવા, કેમ્પસ અને હોસ્ટેલમાં સીસીટીવી કેમેરાનું સતત નિરીક્ષણ કરવા તેમજ નિષ્પક્ષ તપાસ માટે ડિજિટલ પુરાવા સુરક્ષિત રાખવા માટે કડક સૂચનાઓ જારી કરવામાં આવી છે.

 

આગામી સમયમાં નવા વિદ્યાર્થીઓ માટે નિયમિત કાઉન્સેલિંગ સત્રો યોજવા, એન્ટી-રેગિંગ સ્ક્વોડને વધુ સક્રિય બનાવવા અને વિદ્યાર્થીઓ સાથે ગુપ્ત સંવાદ કરીને કેમ્પસમાં સુરક્ષિત વાતાવરણ જાળવી રાખવા માટે તંત્ર દ્વારા વિશેષ દેખરેખ રાખવામાં આવશે.

(6:26 PM IST)