નવી દિલ્હી:  કેન્દ્ર સરકારે  PNG વાપરતા ગ્રાહકો માટે રાંધણ ગેસના નિયમોમાં મોટો અને ઐતિહાસિક સુધારો કર્યો છે. સરકાર દ્વારા જારી કરાયેલા 'એલપીજી રેગ્યુલેશન ઓફ સપ્લાય એન્ડ ડિસ્ટ્રિબ્યુશન એમેન્ડમેન્ટ ઓર્ડર ૨૦૨૬' અંતર્ગત હવે પીએનજી કનેક્શન મેળવ્યા બાદ ગ્રાહકો માત્ર ૩૦ દિવસની અંદર પોતાનું એલપીજી (LPG) કનેક્શન સરેન્ડર કરી શકશે. આ સુધારાની સૌથી મોટી વિશેષતા એ છે કે ગ્રાહકોને એક ખાસ 'ટ્રાન્સફર વાઉચર' આપવામાં આવશે, જેનાથી તેઓ ભવિષ્યમાં જરૂર પડ્યે પોતાના જૂના એલપીજી કનેક્શનને કોઈપણ વધારાના ખર્ચ વિના ફરીથી સક્રિય કરાવી શકશે.

સરકારના આ નિર્ણયથી દેશના એવા લાખો પરિવારોને સીધો ફાયદો થશે જેઓ નોકરીમાં બદલી, શિક્ષણ અથવા ભાડાના ઘરના કારણે વારંવાર શહેરો બદલતા રહે છે. અગાઉ લોકો નવું પીએનજી કનેક્શન લીધા પછી પણ એલપીજી સિલિન્ડર કનેક્શન સરેન્ડર કરવાનું ટાળતા હતા, કારણ કે ભવિષ્યમાં નવા સ્થળે ફરીથી કનેક્શન લેવા માટે લાંબી કાગળની પ્રક્રિયા અને નવી સિક્યોરિટી ડિપોઝિટ ભરવી પડતી હતી. હવે આ નવી વાઉચર સિસ્ટમ આવતાની સાથે જ ગ્રાહકોની આર્થિક અને વહીવટી માથાકૂટોનો કાયમી અંત આવી જશે.

નિષ્ણાતોના મતે, દેશના અગ્રણી શહેરોમાં પીએનજી નેટવર્કનો વ્યાપ ઝડપથી વધી રહ્યો છે ત્યારે ગેસ વિતરણ વ્યવસ્થાને વધુ સુવ્યવસ્થિત અને ડિજિટલ બનાવવા માટે આ પગલું અત્યંત મહત્વનું સાબિત થશે. જો કોઈ ગ્રાહક ભવિષ્યમાં એવા વિસ્તાર કે શહેરમાં સ્થળાંતર કરે છે જ્યાં પીએનજી લાઇન ઉપલબ્ધ નથી, તો તેઓ આ ટ્રાન્સફર વાઉચર બતાવીને તુરંત જ પોતાનું એલપીજી સિલિન્ડર કનેક્શન પુનઃસ્થાપિત કરાવી શકશે. આ નવો નિયમ શહેરી ગ્રાહકોને ઉર્જા વપરાશની બાબતમાં વધુ આઝાદી અને સુગમતા પ્રદાન કરશે.