નવી દિલ્હી : દેશના લઘુમતી સમુદાયોના સર્વાંગી વિકાસ અને તેમની ફરિયાદોના અસરકારક નિવારણ માટે કેન્દ્ર સરકારે હવે કમર કસી લીધી છે. મંગળવારે નવી દિલ્હી ખાતે રાષ્ટ્રીય લઘુમતી આયોગ દ્વારા આયોજિત રાજ્ય લઘુમતી આયોગોની એક ઉચ્ચસ્તરીય પરિષદને સંબોધતા કેન્દ્રીય લઘુમતી બાબતોના મંત્રી કિરેન રિજિજુએ તમામ રાજ્ય આયોગોને એક સ્પષ્ટ અને મક્કમ સૂચના આપી છે. મંત્રીએ ભારપૂર્વક જણાવ્યું હતું કે લઘુમતી સમુદાયોની જે પણ ફરિયાદો કે મુશ્કેલીઓ હોય, તેને માત્ર ફાઈલોમાં દબાવી રાખવાને બદલે સક્રિયપણે અને સમયમર્યાદામાં ઉકેલવી જોઈએ.

સંમેલનને સંબોધતા શ્રી રિજિજુએ વડાપ્રધાન નરેન્દ્ર મોદીના 'સૌના સાથ, સૌના વિકાસ'ના વિઝનને કેન્દ્રમાં રાખીને કહ્યું કે, સરકાર દેશના દરેક નાગરિકના કલ્યાણ માટે પ્રતિબદ્ધ છે. તેમણે મંત્રાલયની મહત્વની યોજનાઓ જેવી કે 'પ્રધાનમંત્રી જન વિકાસ કાર્યક્રમ' (PMJVK) અને 'પ્રધાનમંત્રી વિરાસત કા સંવર્ધન' (PM VIKAS) નો ઉલ્લેખ કરતા જણાવ્યું કે, આ યોજનાઓ લઘુમતી સમુદાયોનું જીવનસ્તર ઊંચું લાવવામાં સીમાચિહ્નરૂપ સાબિત થઈ રહી છે. મંત્રીએ આ આયોગોને વિશ્વાસ અપાવ્યો કે લઘુમતીઓના કલ્યાણ માટે કેન્દ્ર સરકાર હંમેશા તમામ રાજ્યોને પૂરેપૂરું સમર્થન આપશે.

યોજનાઓના લાભો છેવાડાના માનવી સુધી પહોંચાડવા પર ભાર

આ પરિષદમાં ઉપસ્થિત કેન્દ્રીય લઘુમતી બાબતોના રાજ્યમંત્રી જ્યોર્જ કુરિયને વિવિધ કલ્યાણકારી યોજનાઓની વિગતો રજૂ કરી હતી. તેમણે ખાસ કરીને 'PMJVK' નો ઉલ્લેખ કરતા જણાવ્યું કે, આ યોજનાએ લઘુમતી બહુમતી ધરાવતા વિસ્તારોમાં શિક્ષણ, સ્વાસ્થ્ય અને માળખાગત સુવિધાઓના ગેપને પૂરવામાં ખૂબ મોટી મદદ કરી છે. જ્યારે 'PM VIKAS' યોજના દ્વારા યુવાનોને કૌશલ્ય વિકાસ (Skill Development) અને આધુનિક તાલીમ આપીને રોજગાર માટે સક્ષમ બનાવવામાં આવી રહ્યા છે.

વિવિધ રાજ્યોના પ્રતિનિધિઓની હાજરી

રાષ્ટ્રીય લઘુમતી આયોગ દ્વારા આયોજિત આ મહત્વપૂર્ણ મંથનમાં તેલંગાણા, બિહાર, ઉત્તર પ્રદેશ અને ઝારખંડ જેવા રાજ્યોના સંબંધિત મંત્રીઓ, રાજ્ય લઘુમતી આયોગના અધ્યક્ષો અને અનેક વરિષ્ઠ સભ્યોએ ભાગ લીધો હતો. આ મંચ પરથી તમામ રાજ્યોને અપીલ કરવામાં આવી હતી કે કેન્દ્રની યોજનાઓનો મહત્તમ લાભ ઉઠાવીને સમાવેશી પ્રગતિ (Inclusive Growth) ના માર્ગે સાથે મળીને આગળ વધે.

આ પરિષદનો મુખ્ય ઉદ્દેશ્ય કેન્દ્ર અને રાજ્યો વચ્ચે સંકલન સાધીને લઘુમતીઓના હિતમાં લેવાયેલા નિર્ણયોને જમીની સ્તર સુધી ઝડપથી પહોંચાડવાનો છે, જેથી કોઈ પણ સમુદાય વિકાસની દોડમાં પાછળ ન રહી જાય.