ઇન્‍દોર તા.૨૧: મધ્‍ય પ્રદેશના ઇન્‍દોરમાં ભીષણ ગરમીમાં એક દાદાની લાપરવાહીએ તેમની જ પૌત્રીનો જીવ લઈ લીધો. ચાર વર્ષની હજારા નામની દીકરીને કારની પાછળની સીટ પર સૂતી મૂકીને દાદા બે કલાક સુધી ફરતા રહ્યા. બેબી હજારાના પરિવારજનોની બેદરકારી પણ કંઈ ઓછી નહોતી. સાબિર હુસેન નામના દાદા પૌત્રીને લઈને કારમાં ફરવા ગયા હતા. પાછા ફરતી વખતે થાકેલી પૌત્રી કારમાં જ સૂઈ ગઈ. દાદા પણ તેને કારની પાછળની સીટમાં ભૂલીને ઘરે જતા રહ્યા. ભીષણ ગરમીમાં બે કલાક કારમાં લોક રહેવાથી તેનો દમ ઘૂંટાવા લાગ્‍યો હતો અને તેનો જીવ નીકળી ગયો.

પરિવારજનોએ ઘરમાં લાંબા સમયથી બેબીને ન જોઈ ત્‍યારે તેની શોધ શરૂ થઈ. ઘરમાં ન મળી તો બહાર ક્‍યાંક રમવા ગઈ હશે એમ સમજીને બીજે બધે શોધ કરી, પણ બે કલાકે જ્‍યારે કાર ખોલી ત્‍યારે યાદ આવ્‍યું કે બાળકી બે કલાકથી કારમાં જ હતી. સંપૂર્ણપણે લોક કારમાં બે કલાક સુધી ભીષણ ગરમીમાં શેકાયેલી બાળકી બેસુધ હાલતમાં હતી. પરિવારજનો તરત તેને હોસ્‍પિટલ લઈ ગયા, પરંતુ ડોક્‍ટરોએ તેને મૃત જાહેર કરી દીધી હતી.