કટરા : કરોડો ભક્તોની આસ્થાના કેન્દ્ર સમાન જમ્મુ-કાશ્મીરના પવિત્ર ધામ માતા વૈષ્ણોદેવી મંદિરમાંથી એક અત્યંત આઘાતજનક સમાચાર સામે આવ્યા છે. માતાજીના દરબારમાં ભક્તો દ્વારા શ્રદ્ધાપૂર્વક અર્પણ કરવામાં આવતા સોના-ચાંદીના ચઢાવામાં અંદાજે 500 કરોડ રૂપિયાથી વધુનું 'મહાકૌભાંડ' થયું હોવાની આશંકા સેવાઈ રહી છે. શ્રાઈન બોર્ડ પાસે જમા થયેલા ચાંદીના વિશાળ જથ્થાની શુદ્ધતા તપાસતા જે રિપોર્ટ આવ્યો છે, તેણે સમગ્ર દેશને સ્તબ્ધ કરી દીધો છે.

પ્રાપ્ત વિગતો અનુસાર, વૈષ્ણોદેવી શ્રાઈન બોર્ડ પાસે વર્ષોથી સંગ્રહિત થયેલી આશરે 20 ટન જેટલી ચાંદીને ઓગળવા અને તેને શુદ્ધ કરવાની પ્રક્રિયા હાથ ધરવામાં આવી હતી. આ જથ્થાની બજાર કિંમત અંદાજે 550 કરોડ રૂપિયા આંકવામાં આવતી હતી. જોકે, લેબોરેટરી તપાસમાં બહાર આવ્યું કે આટલી મોટી માત્રામાંથી માત્ર 30 કરોડની જ ચાંદી અસલી છે. બાકીની 520 કરોડની કિંમતની ગણાતી ચાંદીમાં 95 ટકા જેટલી કેડમિયમ અને અન્ય હલકી ધાતુઓની મિલાવટ હોવાનું માલૂમ પડ્યું છે.

આસ્થા પર પ્રહાર કે વ્યવસ્થિત કૌભાંડ?

આ સમાચાર વાયુવેગે પ્રસરતા જ જમ્મુ-કાશ્મીરના રાજકારણમાં ગરમાવો આવી ગયો છે. ભાજપના નેતા સુનીલ શર્માએ આને ભક્તોની આસ્થા સાથેનો ક્રૂર ખીલવાડ ગણાવી તટસ્થ તપાસની માંગ કરી છે. બીજી તરફ, વિપક્ષી પાર્ટીઓ PDP અને નેશનલ કોન્ફરન્સે શ્રાઈન બોર્ડના અધ્યક્ષ અને લેફ્ટનન્ટ ગવર્નર મનોજ સિંહા પર સીધા પ્રહારો કર્યા છે. સવાલ એ ઉઠી રહ્યો છે કે શું ભક્તોએ જ મિલાવટવાળી ચાંદી ચઢાવી હતી કે પછી બોર્ડના લોકરમાં રાખવામાં આવેલા અસલી આભૂષણોની અદલાબદલી કરવામાં આવી છે?

નિષ્ણાતોની ચિંતા અને જનતાનો આક્રોશ:

કટરા સુવર્ણકાર એસોસિએશને આ શુદ્ધતાના આંકડા જોઈને આશ્ચર્ય વ્યક્ત કર્યું છે. સામાન્ય રીતે ભક્તો જે દાગીના ચઢાવે છે તેમાં આટલા મોટા પાયે (95%) ભેળસેળ હોવી લગભગ અશક્ય છે. સોશિયલ મીડિયા પર પણ લોકો આ ઘટનાને 'લોકશાહી અને ધર્મનું અપમાન' ગણાવી રહ્યા છે. ભક્તો પૂછી રહ્યા છે કે માતાજીના ચરણોમાં જે દાન અપાયું, તેની સુરક્ષા કરવામાં તંત્ર કેમ નિષ્ફળ ગયું? હવે શ્રાઈન બોર્ડની સત્તાવાર સ્પષ્ટતા અને ઉચ્ચ સ્તરીય તપાસ જ આ 'નકલી ચાંદી' પાછળનું અસલી સત્ય બહાર લાવી શકશે.