બેરૂત :મધ્ય પૂર્વના દેશોમાં ચાલી રહેલી લાંબી કટોકટી વચ્ચે એક અત્યંત ચોંકાવનારા અને મોટા લશ્કરી ઘટનાક્રમમાં ઈઝરાયેલી સેનાએ લેબનોન સરહદની અંદર ઘૂસીને મોટો હુમલો કર્યો છે. ઈઝરાયેલના સૈનિકોએ લેબનોનના દક્ષિણ ભાગમાં આવેલા અત્યંત વ્યૂહાત્મક અને ઐતિહાસિક બ્યુફોર્ટ કિલ્લા (Beaufort Castle) પર સંપૂર્ણ નિયંત્રણ મેળવી લીધું છે. આ લશ્કરી આક્રમણ છેલ્લા ૨૬ વર્ષોમાં લેબનોનની ધરતી પર ઈઝરાયેલ દ્વારા કરવામાં આવેલી સૌથી ઊંડી અને ખતરનાક સૈન્ય કાર્યવાહી માનવામાં આવી રહી છે. આ ઘટનાના પગલે અગાઉ થયેલી કહેવાતી યુદ્ધવિરામ (સીઝફાયર) ની સમજૂતીના સંપૂર્ણપણે ધજાગરા ઉડી ગયા છે અને બંને દેશો વચ્ચે પૂર્ણ કક્ષાનું યુદ્ધ ફાટી નીકળવાની સ્થિતિ સર્જાઈ છે.
ઈઝરાયેલના વડાપ્રધાન બેન્જામિન નેતાન્યાહુએ આ સૈન્ય સફળતા બાદ એક ખાસ વીડિયો સંદેશ જાહેર કરીને ઉત્સાહ વ્યક્ત કર્યો છે. તેમણે જણાવ્યું હતું કે, બ્યુફોર્ટ કિલ્લા પર ઈઝરાયેલી સેનાનો કબજો એ લેબનોનમાં હિઝબુલ્લાહ વિરુદ્ધ ચાલી રહેલા અભિયાનમાં એક અત્યંત મહત્વપૂર્ણ અને 'ડ્રામેટિક શિફ્ટ' (નાટકીય વળાંક) છે. તેમણે ઉમેર્યું કે ઈઝરાયેલ આજે બ્યુફોર્ટમાં એક અલગ અંદાજમાં પાછું ફર્યું છે, અને આ સૈન્ય કાર્યવાહીથી સેનાએ ડરની દીવાલો તોડી નાખીને યુદ્ધની કમાન પોતાના હાથમાં લઈ લીધી છે. ઈઝરાયેલી સૈન્ય હેડક્વાર્ટર દ્વારા બ્યુફોર્ટ રિજ પર ઓપરેશન કરી રહેલા સૈનિકોની સત્તાવાર તસવીરો પણ મીડિયા માટે જારી કરવામાં આવી છે.
આ આક્રમણ એવા સમયે કરવામાં આવ્યું છે જ્યારે અમેરિકામાં ટૂંક સમયમાં જ ઈરાન સાથે પરમાણુ કરાર અને હોર્મુઝની સમુદ્રધૂનીમાં ઓઈલ સપ્લાયની સુરક્ષા બાબતે મહત્વપૂર્ણ રાજકીય વાટાઘાટો યોજાવાની હતી. ઈરાનના મુખ્ય પરમાણુ વાર્તાકારે આ તંગદિલી વચ્ચે સ્પષ્ટ નિવેદન આપ્યું છે કે જ્યાં સુધી ઈરાનના સાર્વભૌમ અધિકારોની સુરક્ષા સુનિશ્ચિત કરવામાં નહીં આવે ત્યાં સુધી અમેરિકા સાથે કોઈ પણ પ્રકારનો નવો કરાર શક્ય નથી. ઈઝરાયેલના આ આક્રમક વલણને કારણે પશ્ચિમ એશિયામાં શાંતિ સ્થાપવાના આંતરરાષ્ટ્રીય પ્રયાસોને મોટો ફટકો પડ્યો છે.
દક્ષિણ લેબનોનની અંદર ઈઝરાયેલી ટેન્કો અને સૈનિકો આગળ વધી રહ્યા હોવાના કારણે વૈશ્વિક સ્તરે ચિંતાની લહેર પ્રસરી ગઈ છે. ફ્રાન્સ સરકારે આ ગંભીર લશ્કરી આક્રમણની નોંધ લઈને સ્થિતિની સમીક્ષા કરવા માટે સંયુક્ત રાષ્ટ્ર સુરક્ષા પરિષદ (UN Security Council) ની કટોકટીની બેઠક બોલાવવાની સત્તાવાર માંગ કરી છે. આંતરરાષ્ટ્રીય સ્તરે ન્યૂયોર્ક અને પેરિસમાં રાજદ્વારી હલચલ તેજ થઈ ગઈ છે અને જો આ સૈન્ય ગતિવિધિઓ તાત્કાલિક રોકવામાં નહીં આવે, તો આ પ્રદેશમાં લાંબા સમય સુધી ચાલનારું મોટું યુદ્ધ ફાટી નીકળશે તેવી દહેશત સંયુક્ત રાષ્ટ્રના નિષ્ણાતો દ્વારા વ્યક્ત કરવામાં આવી રહી છે.