​સેન ફ્રાન્સિસ્કો:​વૈશ્વિક સ્તરે આર્ટિફિશિયલ ઇન્ટેલિજન્સ (AI) ટેક્નોલોજીના ઝડપી વિકાસ અને તેના ઉપયોગને લઈને જનતામાં ફેલાયેલા રોષનું સ્વરૂપ હવે બદલાઈ રહ્યું છે. એક સમયે માત્ર સોશિયલ મીડિયા કે ચર્ચાઓ પૂરતો સીમિત રહેલો આ વિરોધ હવે સીધો શારીરિક હિંસા અને જીવલેણ ધમકીઓ સુધી પહોંચી ગયો છે, જેના પરિણામે વિશ્વની અગ્રણી ટેક કંપનીઓના સીઈઓ અને ટોચના અધિકારીઓ માટે હવે અંગત સુરક્ષા એ વૈભવ નહીં પણ અનિવાર્ય જરૂરિયાત બની ગઈ છે.

​તાજેતરના સમયમાં બનેલી કેટલીક ચોંકાવનારી ઘટનાઓએ સિલિકોન વેલીમાં ખળભળાટ મચાવી દીધો છે. આ વર્ષની શરૂઆતમાં ઓપનએઆઈ (OpenAI) ના સીઈઓ સેમ ઓલ્ટમેનના સેન ફ્રાન્સિસ્કો સ્થિત ઘર પર મોલોટોવ કોકટેલ ફેંકવાની ઘટના અને ત્યારબાદ ગોળીબારના પ્રયાસોએ આખી ટેક ઇન્ડસ્ટ્રીને હચમચાવી દીધી છે. આ માત્ર એકલદોકલ કિસ્સો નથી; અન્ય એક અગ્રણી AI સ્ટાર્ટઅપ 'એન્થ્રોપિક'ની ઓફિસમાં પણ એક વ્યક્તિ ઘૂસી આવી હતી અને તેણે એક ટોચના અધિકારીને જાનથી મારી નાખવાની ધમકી આપી હતી.

​આ વધતા જોખમો પાછળના કારણોનું વિશ્લેષણ કરતાં નિષ્ણાતો જણાવે છે કે, AIને કારણે નોકરીઓ ગુમાવવાનો ડર, પ્રાઈવસીને લઈને ચિંતાઓ, પર્યાવરણીય અસરો અને ટેક કંપનીઓના વધતા પ્રભાવ સામે સામાન્ય નાગરિકોમાં ભારે નારાજગી છે. જે રીતે ટેક્નોલોજી સમાજના તાણાવાણા બદલી રહી છે, તે બદલાવ સ્વીકારવા તૈયાર ન હોય તેવા વર્ગો હવે કંપનીના વડાઓને નિશાન બનાવી રહ્યા છે.

​આ સ્થિતિને ધ્યાનમાં રાખીને ટેક કંપનીઓએ તેમની સુરક્ષા વ્યૂહરચનામાં મોટો ફેરફાર કર્યો છે. અગાઉ જે અધિકારીઓ અંગત સુરક્ષાને પોતાની છબી માટે 'અડચણરૂપ' માનતા હતા, તેઓ હવે સશસ્ત્ર સુરક્ષા ગાર્ડ્સ, બુલેટપ્રૂફ વાહનો અને સુરક્ષિત નિવાસસ્થાનો જેવી કડક વ્યવસ્થાઓ અપનાવી રહ્યા છે. કોર્પોરેટ જગતમાં હવે સુરક્ષા પાછળ થતા ખર્ચને 'પર્સનલ પર્ક' (અંગત લાભ) ને બદલે 'વ્યાપારિક જરૂરિયાત' તરીકે જોવામાં આવી રહ્યો છે.

​આવી સ્થિતિમાં સુરક્ષા અને જોખમ વ્યવસ્થાપન કરતી એજન્સીઓનો કારોબાર પણ તેજીમાં છે. ડેટા સેન્ટરો અને અન્ય મહત્વની ઇન્ફ્રાસ્ટ્રક્ચર સુવિધાઓ સામે પણ વિરોધના વંટોળ તેજ થયા છે, જેના લીધે અનેક પ્રોજેક્ટ્સ અટકી પડ્યા છે. ટેક કંપનીઓ હવે માત્ર સોફ્ટવેર અને મોડલ્સ બનાવવામાં જ નહીં, પરંતુ પોતાના નેતૃત્વ અને ઇન્ફ્રાસ્ટ્રક્ચરને સુરક્ષિત રાખવા માટે પણ કરોડો ડોલરનો ખર્ચ કરી રહી છે, જે AI ક્રાંતિની આડઅસર તરીકે જોવામાં આવી રહ્યું છે.