મુંગેર: તા.14 બિહારના રાજકારણમાં આજે જેનું નામ ગાજે છે તેવા સમ્રાટ ચૌધરીની સફર કોઈ ફિલ્મી પટકથાથી ઓછી નથી. મુંગેરના તારાપુરની ગલીઓમાં જે બાળકને તેના ઘરના સભ્યો અને પડોશીઓ પ્રેમથી 'ગુલ્લુ' કહીને બોલાવતા હતા, તે આજે આખા રાજ્યના 'સમ્રાટ' તરીકે ઉભરી આવ્યા છે. આ માત્ર એક નામ બદલવાની પ્રક્રિયા નથી, પરંતુ એક સામાન્ય યુવાનના અસાધારણ સંઘર્ષ અને દૃઢ નિશ્ચયની વિજયગાથા છે.
પરિવારના લાડકવાયા 'ગુલ્લુ' ની અજાણી વાતો
સમ્રાટ ચૌધરી ચાર ભાઈઓમાં ત્રીજા નંબરના છે. તેમના બાળપણની યાદો આજે પણ પરિવારના હૃદયમાં જીવંત છે. તેમની મોટી બહેન નીલમ દેવી તેમને પ્રેમથી 'ગુલ્લુ' કહીને બોલાવતી હતી અને ધીમે ધીમે આખું ગામ તેમને આ જ નામે ઓળખવા લાગ્યું હતું. જોકે, જીવન હંમેશા સરળ રહ્યું નથી. સમ્રાટજીએ પોતાના મોટા ભાઈ અને એક બહેનને ગુમાવ્યા છે. આ વ્યક્તિગત આઘાતોએ તેમને તોડવાને બદલે અંદરથી વધુ મજબૂત અને સંવેદનશીલ બનાવ્યા છે.
પિતાએ આપ્યું 'સમ્રાટ' નામ અને એક મોટું લક્ષ્ય
જ્યારે ગુલ્લુની રાજકીય સમજ અને જવાબદારીઓ વધવા લાગી, ત્યારે તેમના પિતા અને દિગ્ગજ નેતા શકુની ચૌધરીએ અનુભવ્યું કે હવે તેમના પુત્રએ મોટા ધ્યેયો તરફ આગળ વધવું જોઈએ. તેમણે જ 'ગુલ્લુ' નામ બદલીને 'સમ્રાટ ચૌધરી' રાખ્યું. આ નામ પરિવર્તન પાછળનો હેતુ તેમને બિહારના રાજકારણમાં એક મજબૂત ઓળખ અપાવવાનો હતો, જે આજે સાચો સાબિત થયો છે.
સૌથી નાની ઉંમરે મંત્રી અને શિસ્તબદ્ધ નેતૃત્વ
સમ્રાટ ચૌધરીની ગ્લેમરસ રાજકીય કારકિર્દીનો પાયો ત્યારે નંખાયો જ્યારે તેઓ અત્યંત નાની ઉંમરે લાલુ પ્રસાદ યાદવની સરકારમાં મંત્રી બન્યા. ત્યારબાદ અનેક રાજકીય ઉતાર-ચઢાવ આવ્યા, પરંતુ તેમની શિસ્ત અને કાર્યનિષ્ઠાએ તેમને ભીડથી અલગ રાખ્યા. ભાજપમાં જોડાયા પછી તેમની સંગઠનાત્મક શક્તિને કારણે તેમને પ્રદેશ પ્રમુખ અને ત્યારબાદ ડેપ્યુટી સીએમ જેવી મહત્વની જવાબદારીઓ સોંપવામાં આવી.
આજે પણ એ જ સરળતા
ભલે આજે આખું બિહાર તેમને મુખ્યમંત્રી તરીકે માન-સન્માન આપી રહ્યું હોય, પરંતુ તેમની સાથે જોડાયેલા લોકો કહે છે કે સમ્રાટ ચૌધરીમાં આજે પણ એ જ જૂનો 'ગુલ્લુ' જીવે છે—એ જ સરળતા અને લોકોની તકલીફો પ્રત્યેની સંવેદનશીલતા. તેઓ રાજનીતિને માત્ર સત્તા મેળવવાનું સાધન નહીં, પણ લોકસેવાનો માર્ગ માને છે.
તારાપુરની માટીમાંથી ઉઠીને પટનાના સત્તાના સિંહાસન સુધી પહોંચનારી આ સફર સાબિત કરે છે કે જો ઈરાદા નેક હોય અને મહેનત સાચી હોય, તો નસીબ પણ પોતાનો રસ્તો બદલી નાખે છે.