જયપુર : રાજસ્થાન પોલીસ અને સરકારી વિભાગોના અત્યંત સંવેદનશીલ ડેટાબેઝમાં મોટો સાયબર સેંઢ મારવામાં આવ્યો હોવાનો ખળભળાટ મચાવનારો દાવો સામે આવ્યો છે. "સ્કારલેટગ્રુપ" નામના હેકર જૂથે રાજસ્થાન પોલીસના ૮૬.૩ લાખથી વધુ ઇમેઇલ્સ અને વરિષ્ઠ અધિકારીઓની ગુપ્ત માહિતી એક્સેસ કરી હોવાનો અને તેને ડાર્કનેટ પર વેચાણ માટે મૂકી હોવાનો આક્ષેપ કર્યો છે. આ ઘટનાને પગલે રાજ્યની સાયબર ટીમો, સાયબર કમાન્ડો અને ઇન્સિડેન્ટ રિસ્પોન્સ ટીમોએ તાત્કાલિક ધોરણે ઊંડાણપૂર્વકની તપાસ હાથ ધરી છે.
સોશિયલ મીડિયા પોસ્ટમાં હેકર જૂથે દાવો કર્યો છે કે તેમણે રાજસ્થાન પોલીસના ૫,૯૨૬ મેઇલબોક્સ, ૭૮.૩ લાખથી વધુ યુનિક ઇમેઇલ્સ, ૭૦,૩૦૧ આઇડેન્ટિટી રેકોર્ડ્સ અને ૫૯,૪૬૦ મોબાઇલ નંબર્સ એક્સેસ કર્યા છે. આ ઉપરાંત માહિતી ટેકનોલોજી અને સંદેશાવ્યવહાર વિભાગ (DoIT&C) ના ૧,૦૬૫ મેઇલબોક્સ, ૬૯ લોગિન આઈડી, ૨૧ VPN લોગિન અને વરિષ્ઠ અધિકારીઓના ૬૪ VPN સર્ટિફિકેટ્સ હેક કર્યાનો પણ દાવો છે. હુમલાખોરોએ એફઆઈઆર (FIR), કોલ ડિટેલ રેકોર્ડ્સ (CDR), e-KYC રેકોર્ડ્સ, સાક્ષીઓના નિવેદનો અને ગુપ્ત ઇમેઇલ્સ જેવા મહત્વપૂર્ણ દસ્તાવેજોના સેમ્પલ પણ શેર કર્યા છે. આ મામલે સાયબર ક્રાઇમના DIG શાંતનુ કુમારે જણાવ્યું કે ભારત સરકારની સંસ્થા CERT-In અને Indian Cyber Crime Coordination Centre (I4C) ની મદદથી તપાસ ચાલી રહી છે, જોકે હજુ સુધી કોઈ ટેકનિકલ નબળાઈ કે ડેટા લીકની સત્તાવાર પુષ્ટિ થઈ નથી.
મળતી માહિતી મુજબ, ડેટાના દાવંગિરી અને સ્ત્રોતની ચકાસણી કરવા રાજ્ય સાયબર ટીમ અને DoIT અધિકારીઓએ ટેલિગ્રામ દ્વારા હેકર જૂથનો સંપર્ક કર્યો હતો, જેમાં $100-200 ની ચુકવણી અંગે ચર્ચા થઈ હતી પરંતુ કોઈ આખરી કરાર થયો ન હતો. સાવચેતીના ભાગરૂપે રાજસ્થાનભરના તમામ પોલીસ અધિકારીઓને તાત્કાલિક ધોરણે પોતાના ઇમેઇલ પાસવર્ડ બદલવા, મોબાઇલ અને લેપટોપ અપડેટ કરવા તેમજ સાયબર ગાઇડલાઇન્સનું કડક પાલન કરવાનો આદેશ આપવામાં આવ્યો છે. ઉલ્લેખનીય છે કે, તપાસ દરમિયાન રાજસ્થાન પોલીસની સત્તાવાર વેબસાઇટ અપ્રાપ્ય (ઓફલાઇન) રહી હતી.
અત્રે ઉલ્લેખનીય છે કે, તાજેતરના સમયમાં eMudhra થી લઈને બેંક ઓફ બરોડા સુધીના અનેક મોટા ડેટા લીકના કિસ્સાઓ પ્રકાશમાં આવ્યા છે. હાલમાં જ પંજાબના બે શખ્સોની ધરપકડ અને સરહદી વિસ્તારમાંથી ડ્રોન વડે છોડાયેલા શસ્ત્રો-વિસ્ફોટકો જપ્ત થવાની ઘટનાઓ પણ ચર્ચામાં રહી હતી. તમામ તપાસ ટીમોના આખરી અહેવાલ આવ્યા બાદ જ સમગ્ર સત્ય બહાર આવશે, પરંતુ સુરક્ષા અને ગોપનીયતા જાળવવા માટે આવનારા દિવસોમાં સરકારી સર્વર્સની સાયબર સુરક્ષા ઓડિટ અને સેફ્ટી પ્રોટોકોલ્સ વધુ મજબૂત બનાવવામાં આવે તેવી પૂરી શક્યતા છે.