કરૌલી તા.૨૪: રાજસ્‍થાનના કરૌલી જિલ્‍લામાં એક એવું હનુમાન મંદિર છે જે આખું વર્ષ પાણીમાં ડૂબેલું રહે છે અને ફક્‍ત ઉનાળાના બે મહિના એમાં કમરસમા પાણીમાં દર્શન કરવા જઈ શકાય છે. વરસાદના દિવસોમાં આ મંદિર જળમગ્ન થઈ જાય છે. આ એવું મંદિર છે જ્‍યાં હનુમાનજીના ખભા પર ભગવાન રામ અને લક્ષ્મણજી બિરાજમાન છે અને એને ચમત્‍કારિક માનવામાં આવે છે. ભાવિકો બાધા રાખવા માટે આ મંદિરમાં આવતા રહે છે.

ચારે તરફ પાણી હોવા છતાં એ મજબૂતીથી ઊભું છે. કરૌલીના વીરવાંસના પહાડોમાં આ મંદિર આવેલું છે અને ૪૦ વર્ષથી પાણીથી ઘેરાયેલું છે. આ મંદિર પાસે જ અંજનીમાતાનું મંદિર છે. ભાવિકોમાં આ મંદિર બગીચેવાલે હનુમાન તરીકે પ્રસિદ્ધ છે અને હજારો વર્ષ પ્રાચીન માનવામાં આવે છે