તા. ૧૨ નવેમ્બર ર૦ર૬ વિક્રમ સંવત ર૦૮૩ કારતક સુદ – ૩ ગુરૂવાર
ગુજરાતમાં હાર્ટ અટેકથીઃ દરરોજ સરેરાશ ૯ લોકોનાં મોત : ગુજરાતીઓના હૃદય નબળા પડી રહ્યા છે...૧૦ વર્ષમાં હાર્ટ એટેકથી થતા મૃત્યુમાં ૨૬ ટકાનો વધારો થયો
નવી દિલ્હી તા.૧૨: ગુજરાતીઓના હૃદય નબળા પડી રહ્યા છે. એનસીઆરબીના રિપોર્ટ મુજબ, રાજ્યમાં ૧૦ વર્ષમાં હાર્ટ એટેકથી થતા મૃત્યુમાં ૨૬ ટકાનો વધારો થયો છે. વર્ષ ૨૦૨૪માં ગુજરાત પોલીસે ૩૨૫૩ વ્યક્તિના અકસ્માત મોત નોંધ્યા હતા, જેમાં મોતનું કારણ હાર્ટ એટેક હોવાનું જાણવા મળ્યું હતું. આ સંખ્યા સરેરાશ દરરોજના ૯ મૃત્યુ દર્શાવે છે. કુલ પીડિતોમાં ૮૯.૪ પુરુષો હતા. હાર્ટ એટેકના કારણે થતાં અચાનક મૃત્યુના કિસ્સામાં ૨૦૧૫ના ૨૫૮૧ કેસની સરખામણીએ એક દાયકામાં ૨૬ ટકાનો તોતિંગ વધારો થયો હતો.
૨૦૨૪માં મહારાષ્ટ્રના ૧૪,૮૭૪ અને કેરળના ૫૦૧૫ કેસ પછી ભારતભરમાં ગુજરાત ત્રીજા ક્રમે હતું. ભારતમાં અકસ્માત મૃત્યુ તરીકે નોંધાયેલા કુલ હાર્ટ અટેકના મોતમાંથી ૮.૫ ટકા હિસ્સો માત્ર ગુજરાતનો હતો. આ વિગતો નેશનલ ક્રાઈમ રેકોર્ડ બ્યુરો (NCRB) દ્વારા તાજેતરમાં બહાર પાડવામાં આવેલા અહેવાલ ભારતમાં અકસ્માત મૃત્યુ અને આત્મહત્યા (ADSI) ૨૦૨૪નો ભાગ છે.
ગુજરાતમાં થયેલા કુલ ૨૩૭૯૦ અકસ્માત મૃત્યુમાંથી ૧૩.૭ ટકા મૃત્યુ હાર્ટ અટેકના કારણે થયા હતા. ૨૦૨૩થી ગુજરાતમાં ડાન્સ કે અન્ય પ્રવૃત્તિઓ દરમિયાન અચાનક ઢળી પડતા લોકોના અનેક વીડિયો વાયરલ થયા હતા, જેના કારણે નાગરિકોમાં કોરોનરી આર્ટરી ડિસીઝના વધતા જતા પ્રમાણ અંગે ચિતા જન્મી છે.
અહેવાલ મુજબ, ગુજરાતમાં માર્ગ અકસ્માતમાં ૭૭૧૭ લોકોએ જીવ ગુમાવ્યા પછી અકસ્માત મૃત્યુ માટે હાર્ટ અટેક બીજું મુખ્ય પરિબળ હતું. ગુજરાતમાં કુલ ૩૧૪૫૦ અકસ્માત કેસ નોંધાયા હતા, જેમાં ૧૪૯૫૨ વ્યક્તિઓ ઘાયલ થઈ હતી અને ૨૩,૭૯૦ વ્યક્તિઓના મોત થયા હતા. કુલ અકસ્માત મૃત્યુની દ્રષ્ટિએ, રાજ્ય ભારતના રાજ્યોમાં સાતમા ક્રમે હતું.
સૂત્રોના જણાવ્યા પ્રમાણે, કોવિડ પછી લોકોની ખાનપાનની મોટો ફેરફાર થયો છે. આપણે બહારનું ખાવાનું વધારે રાખીએ છીએ, અલ્ટ્રા-પ્રોસેસ્ડ અને ભારે ખોરાક લઈએ છીએ જે અંતે કોલેસ્ટ્રોલના સ્તરમાં વધારો કરે છે. વધુમાં, અનેક અભ્યાસોએ LDL (ખરાબ કોલેસ્ટ્રોલ) ના ઊંચા સ્તર અને HDL (સારા કોલેસ્ટ્રોલ) ના નીચા સ્તર તરફ નિર્દેશ કર્યો છે, જે એકંદર લિપિડ પ્રોફાઇલને બદલી નાખે છે. આ પરિબળોને બેઠાડું જીવનશૈલી અને હાઈ બ્લડ પ્રેશર, ડાયાબિટીસ તથા મેદસ્વીતા સાથે જોડો એટલે આપણો સમાજ કોરોનરી આર્ટરી ડિસીઝના સાયલન્ટ એપિડેમિક પર જોખમી રીતે ઉભો છે.
ગુજરાત અને અમદાવાદમાં અગાઉ થયેલા અભ્યાસોએ હાર્ટ અટેકને કારણે થતા અચાનક મૃત્યુના કેસોમાં ધમનીઓમાં પ્લાક રપ્ચર (નળીઓમાં જામી ગયેલો કચરો ફાટવો) ને મુખ્ય પરિબળ ગણાવ્યું હતું. નિષ્ણાતોના મતે અન્ય પરિબળોમાં હૃદયની બળતરા, એન્જીયોપેથી અને કાર્ડિયોમાયોપેથીનો સમાવેશ થાય છે.
સૂત્રોએ નાની ઉંમરે હૃદયરોગનું વધતું પ્રમાણ અને તણાવ જેવા પરિબળો તરફ પણ ઈશારો કર્યો હતો. કાર્ડિયોલોજિસ્ટ્સે વહેલી તકે નિદાન કરીને ગંભીર હૃદયરોગની શક્યતાઓને રોકવા માટે ૪૦ વર્ષની ઉંમર પછી નિયમિત ચેક-અપ કરવાની સલાહ આપી હતી.
ગુજરાતમાં હાર્ટ અટેકને કારણે નોંધાયેલા અચાનક મૃત્યુના આંકડા
વર્ષ મૃત્યુઆંક
૨૦૧૫ ૨૫૮૧
૨૦૧૬ ૨૭૯૯
૨૦૧૭ ૨૮૧૩
૨૦૧૮ ૩૨૦૬
૨૦૧૯ ૨૮૮૮
૨૦૨૦ ૨૫૭૯
૨૦૨૧ ૨૯૪૮
૨૦૨૨ ૨૮૫૩
૨૦૨૩ ૩૧૫૬
૨૦૨૪ ૩૨૫૩
(10:40 AM IST)
છેલ્લા 8 દિવસમાં સૌથી લોકપ્રિય 
