માડીકેરી (કોડાગુ): કર્ણાટકના પ્રખ્યાત પ્રવાસન સ્થળ કોડાગુના કુશલનગરમાં આવેલા 'દુબારે એલિફન્ટ કેમ્પ' (Dubare Elephant Camp) માંથી એક અત્યંત દર્દનાક અને કંપાવનારી ઘટના સામે આવી છે. કેમ્પમાં હાથીઓને નવડાવવાની પ્રવૃત્તિ દરમિયાન બે વિશાળકાય પાળેલા હાથીઓ અચાનક પરસ્પર હિંસક રીતે લડી પડ્યા હતા. આ લડાઈ દરમિયાન સંતુલન ગુમાવનારો એક ભારેખમ હાથી ત્યાં ઉભેલી પ્રવાસી મહિલા પર જીવલેણ રીતે ખાબક્યો હતો. હાથીના વિશાળ શરીર નીચે કચડાવાને કારણે મહિલાનું ઘટનાસ્થળે જ કમકમાટીભર્યું મોત નીપજ્યું હતું, જ્યારે તેની બાજુમાં ઉભેલા તેના પતિ અને માસૂમ બાળકનો આબાદ બચાવ થયો છે.

તમિલનાડુથી ખુશી-ખુશી ફરવા આવ્યો હતો પરિવાર

પોલીસના સત્તાવાર અહેવાલ મુજબ, મૃતક મહિલાની ઓળખ ૩૩ વર્ષીય જોયસી તરીકે થઈ છે. જોયસી પોતાના પતિ અને બાળક સાથે તમિલનાડુથી કર્ણાટકના સુંદર હિલ સ્ટેશન કોડાગુમાં વેકેશન મનાવવા માટે આવી હતી. સોમવારે આ પરિવાર દુબારે કેમ્પમાં હાથીઓની દિનચર્યા જોવા પહોંચ્યો હતો. કેમ્પમાં જ્યારે હાથીઓને નદીમાં સ્નાન કરાવવામાં આવી રહ્યું હતું, ત્યારે આ અણધારી આફત તૂટી પડી હતી જેને જોઈને ત્યાં હાજર અન્ય સેંકડો પ્રવાસીઓના પણ શ્વાસ અધ્ધર થઈ ગયા હતા.

તાલીમ પામેલા 'કંજન' અને 'માર્થંડા' વચ્ચે જામ્યું લોહિયાળ યુદ્ધ

વન વિભાગના અધિકારીઓએ જણાવ્યું કે, કેમ્પના બે સૌથી શાંત અને તાલીમ પામેલા હાથીઓ 'કંજન' અને 'માર્થંડા' નદીમાં નાહી રહ્યા હતા. આ દરમિયાન અચાનક કોઈ કારણે બંને ઉશ્કેરાઈ ગયા અને તેમની વચ્ચે ઝઘડો શરૂ થયો. ત્યાં હાજર માહુતો (મહાવત) એ બંનેને કાબૂમાં લેવાના આકાશ-પાતાળ એક કર્યા, પરંતુ ગુસ્સે ભરાયેલા કંજને માર્થંડા પર જોરદાર ટક્કર મારી દીધી. આ ભયાનક ટક્કરથી માર્થંડા પોતાનું સંતુલન જાળવી શક્યો નહીં અને સીધો બહાર નદી કિનારે ઉભેલી જોયસી પર જઈને પડ્યો. જોયસી હાથીના વિશાળ વજન નીચે સંપૂર્ણપણે ફસાઈ ગઈ અને શ્વાસ રૂંધાવાથી તેનું કરુણ મોત થયું.

વન મંત્રીએ વ્યક્ત કર્યો ભારે આઘાત, નિયમો કરાયા કડક

આ કાળજું કંપાવનારી ઘટના પર કર્ણાટકના વન, ઇકોલોજી અને પર્યાવરણ મંત્રી ઈશ્વર ખંડ્રેએ ઊંડો શોક વ્યક્ત કર્યો છે. તેમણે પીડિત પરિવાર પ્રત્યે સંવેદના વ્યક્ત કરતા આ ઘટનાને "અત્યંત પીડાદાયક અને આઘાતજનક" ગણાવી છે અને આ મામલે વ્યાપક તપાસના આદેશ જારી કર્યા છે. મંત્રીએ સ્પષ્ટ કર્યું કે વન્યજીવો ભલે ગમે તેટલા તાલીમ પામેલા હોય, પણ તેમના વર્તનનું અગાઉથી અનુમાન લગાવવું અશક્ય છે.

ભવિષ્યમાં આવી કોઈ દુર્ઘટના ફરી ન બને તે માટે વન મંત્રીએ તાત્કાલિક અસરથી કર્ણાટકના તમામ એલિફન્ટ કેમ્પ માટે નવા કડક નિયમો લાગુ કર્યા છે. હવેથી પ્રવાસીઓ માટે હાથીઓની સૂંઢને સ્પર્શ કરવા, તેમની એકદમ નજીક ઊભા રહીને ફોટોગ્રાફ કે સેલ્ફી લેવા, પ્રવાસીઓ દ્વારા હાથીઓને નવડાવવા તેમજ તેમને ગોળ, કેળા કે અન્ય કોઈ ખાદ્ય પદાર્થો ખવડાવવા પર સંપૂર્ણ પ્રતિબંધ મૂકી દેવામાં આવ્યો છે. વન વિભાગને હવે તમામ પ્રવાસીઓ વન્યજીવોથી માત્ર નિર્ધારિત અને સુરક્ષિત અંતર જ જાળવી રાખે તે સુનિશ્ચિત કરવા સખત સૂચના આપવામાં આવી છે.