નાગપુર  : નાગપુરના કાન્હાન રેલ્વે સ્ટેશન નજીક તુકારામ નગર વિસ્તારમાં મુંબઈ-હાવડા મુખ્ય લાઈન પર શનિવારે વહેલી સવારે એક દુઃખદ અકસ્માત સર્જાયો હતો. અહીં રેલ્વે ટ્રેક ઓળંગી રહેલા હરણના ટોળાને એક ઝડપી ટ્રેને અડફેટે લેતા ૫ માદા અને ૧ નર હરણનું ઘટનાસ્થળે જ કરુણ મોત નીપજ્યું હતું. સવારે ૪ થી ૫ વાગ્યાના અરસામાં બનેલી આ ઘટનાએ સમગ્ર પંથકમાં વન્યજીવોની સુરક્ષા અંગે ગંભીર ચિંતા જગાવી છે.

સ્થાનિક રહીશો દ્વારા રેલ્વે ટ્રેક પર મૃત હાલતમાં પડેલા હરણ જોઈને તુરંત વન વિભાગ અને પોલીસને જાણ કરવામાં આવી હતી. માહિતી મળતાની સાથે જ વન વિભાગની ટીમ અને પોલીસ કાફલો ઘટનાસ્થળે પહોંચી ગયો હતો. અધિકારીઓએ સ્થળ પર પહોંચીને પંચનામું કર્યું અને તમામ મૃત હરણના દેહને પોસ્ટમોર્ટમ માટે ખસેડવામાં આવ્યા હતા. રેલ્વે ટ્રેક પાસે જંગલ વિસ્તાર નજીક હોવાથી વન્યજીવોના આવા અકસ્માતો અવારનવાર બનતા હોય છે.

આ ઘટના અંગે વન અધિકારીઓએ જણાવ્યું હતું કે હરણનું ટોળું રેલ્વે લાઈન ઓળંગીને બીજી તરફ જઈ રહ્યું હતું ત્યારે આ ઝડપી ટ્રેન તેમની ઉપરથી પસાર થઈ હતી. ટ્રેનની ગતિ વધુ હોવાથી હરણોને બચવાનો કોઈ મોકો મળ્યો નહોતો. આ દુર્ઘટનામાં કુલ ૬ વન્યજીવોએ જીવ ગુમાવ્યા છે, જે પર્યાવરણ અને વન્યજીવ સંરક્ષણની દ્રષ્ટિએ મોટી ક્ષતિ ગણાય છે.

મધ્યપ્રદેશના શાજાપુર જિલ્લામાં પણ તાજેતરમાં આવી જ એક કરુણ ઘટના સામે આવી હતી, જેમાં એક કુવામાંથી ૧૩ કાળિયાર અને એક રખડતા કૂતરાના મૃતદેહ મળી આવ્યા હતા. ખારદોન કલાન ગામમાં દુર્ગંધ આવતા સ્થાનિક લોકોએ તપાસ કરતા આ તમામ પ્રાણીઓ કુવામાં પડી ગયા હોવાનું જણાયું હતું. વન વિભાગની ટીમે ત્યાં પહોંચીને મૃતદેહો બહાર કાઢ્યા હતા, જે દર્શાવે છે કે માનવ વસાહતો અને જંગલ વિસ્તારની સરહદ પર વન્યજીવો સુરક્ષિત નથી.

હાલમાં નાગપુરના કન્હાન પોલીસ સ્ટેશન દ્વારા આ મામલે આગળની કાર્યવાહી હાથ ધરવામાં આવી છે. વન વિભાગ હવે આ વિસ્તારમાં વન્યજીવોના ટ્રેક ઓળંગવા પર પ્રતિબંધ અથવા ફેન્સિંગ (વાડ) બનાવવા અંગે વિચારી રહ્યું છે જેથી ભવિષ્યમાં આવા અકસ્માતો નિવારી શકાય. મૃત હરણોના પોસ્ટમોર્ટમ રિપોર્ટ બાદ આગળની કાયદેસરની તપાસ પૂર્ણ કરવામાં આવશે.