​શિવપુરી / ભોપાલ:મધ્ય પ્રદેશના શિવપુરી જિલ્લામાંથી હૃદયસ્પર્શી અને કાળજું કંપાવી દે તેવી ઘટના સામે આવી છે. માનસિક તણાવ અને વિયોગના આઘાતમાં બે સગી બહેનોએ પોતાના ચાર માસૂમ બાળકો સાથે અલગ-અલગ સ્થળે આવેલા કૂવામાં કૂદીને આત્મહત્યા કરી લીધી છે. આ ગંભીર ત્રાસદીમાં બંને બહેનો અને ચાર બાળકો સહિત કુલ ૬ લોકોના કરૂણ મોત નીપજ્યા છે, જ્યારે એક ગર્ભસ્થ શિશુનું પણ ગર્ભમાં જ પ્રાણપંખેરૂ ઊડી ગયું છે.

​પતિના મોતનો આઘાત નાની બહેન સહન ન કરી શકી

પ્રાપ્ત વિગતો અનુસાર, પ્રથમ ઘટના બેરાડ પોલીસ સ્ટેશન હેઠળના ગુંગરગાંવમાં બુધવારે બપોરે ઘટી હતી. અહીં રહેતી ૩૫ વર્ષીય અંજલિ રાવતના પતિ ધર્મવીરનું એક મહિના અગાઉ જ એક માર્ગ અકસ્માતમાં અવસાન થયું હતું. પતિના અચાનક વિયોગથી અંજલિ ભારે માનસિક તણાવ અને ઊંડા આઘાતમાં હતી. બુધવારે બપોરે ૮ મહિનાની ગર્ભવતી અંજલિએ તેના ૬ વર્ષના પુત્ર પ્રશાંત સાથે ખેતરમાં આવેલા કૂવામાં ઝંપલાવી દીધું હતું. અંજલિ પોતાની પુત્રીઓને પણ સાથે લઈ ગઈ હતી, પરંતુ મોટી પુત્રીએ સુઝબૂઝ વાપરી પોતાની નાની બહેનોનો હાથ પકડીને ત્યાંથી ભાગી જઈ પરિવારજનોને જાણ કરી હતી. પરિજનો પહોંચ્યા ત્યાં સુધીમાં અંજલિ, તેનો પુત્ર અને ગર્ભમાં રહેલું બાળક ત્રણેય દમ તોડી ચૂક્યા હતા.

​નાની બહેનના મોતના સમાચાર સાંભળી મોટી બહેને પણ અંતિમ પગલું ભર્યું

નાની બહેનની આત્મહત્યાના આઘાતમાંથી પરિજનો બહાર આવે તે પહેલા જ સાંજે કોલારસ વિસ્તારના ખોંકર ગામમાંથી બીજો ભયાનક સમાચાર મળ્યો હતો. અંજલિની મોટી બહેન, ૪૦ વર્ષીય સીતા રાવતે પોતાની નાની બહેનના મોતના આઘાતમાં સંધ્યા સમયે પોતાના ત્રણ બાળકો—રાખી (૧૪), પ્રિયંકા (૧૧) અને શ્લોક (૬) સાથે ખેતરના કૂવામાં કૂદીને જીવન ટૂંકાવી લીધું હતું. મોડી સાંજે સીતા અને બાળકો ઘરે ન પરત ફરતા પરિવારજનોએ શોધખોળ હાથ ધરી હતી, જ્યાં કૂવાની બહાર ચપ્પલો અને અંદર તરતા શબ જોઈને તેમના પગ તળેથી જમીન સરકી ગઈ હતી.

​પોલીસે મૃતદેહો બહાર કાઢી તપાસ હાથ ધરી

ઘટનાની જાણ થતાં જ પોલીસ કાફલો અને ગ્રામજનો ઘટનાસ્થળે દોડી આવ્યા હતા. બુધવારે મોડી રાત્રે કૂવામાંથી મા-બાળકોના મૃતદેહો બહાર કાઢીને પોસ્ટમોર્ટમ અર્થે હોસ્પિટલ મોકલી આપવામાં આવ્યા હતા. એક જ દિવસમાં એક જ પરિવારની બે દીકરીઓ અને ચાર પૌત્રોના કરૂણ મોતથી બંને ગામોમાં ચાનક વ્યાપી ગઈ છે અને સન્નાટો છવાઈ ગયો છે. પોલીસે પ્રાથમિક તબક્કે આત્મહત્યાના બંને ગુના નોંધીને આ કરૂણ ઘટના પાછળ અન્ય કોઈ કારણ છે કે કેમ તે દિશામાં ઘેરી તપાસ શરૂ કરી છે.