દિલ્હી: સમગ્ર ઉત્તર ભારત સહિત દેશની રાજધાની દિલ્હીમાં આગામી દિવસોમાં આકાશમાંથી અગનગોળા વરસવાની હવામાન વિભાગે ગંભીર ચેતવણી જારી કરી છે. ભારત હવામાન વિભાગ (IMD) ના તાજા અહેવાલ અનુસાર, ૨૨ મે સુધી દિલ્હી સહિતના આસપાસના રાજ્યોમાં તીવ્ર હીટવેવ એટલે કે ગરમીનું ભયાનક મોજું ફરી વળવાની પૂરેપૂરી શક્યતા છે. આ દિવસો દરમિયાન રાષ્ટ્રીય રાજધાનીમાં મહત્તમ તાપમાન ૪૪ ડિગ્રી સેલ્સિયસ સુધી પહોંચી જવાનો અંદાજ હોવાથી સામાન્ય જનજીવન પ્રભાવિત થવાની આશંકા સેવાઈ રહી છે.
હવામાન વૈજ્ઞાનિકોના જણાવ્યા અનુસાર, પાકિસ્તાન અને સરહદી રાજ્ય રાજસ્થાન તરફથી આવી રહેલા અત્યંત ગરમ અને સૂકા ઉત્તર-પશ્ચિમના પવનોના કારણે સમગ્ર પ્રદેશમાં તાપમાન ઝડપથી ઉપર તરફ જઈ રહ્યું છે. આ ગરમ પવનોની ગતિને પગલે મે મહિનાના મધ્યમાં જ લૂના આકરા મોજાં શરૂ થઈ ગયા છે. હવામાન વિભાગે લોકોને આ ગંભીર પરિવર્તન સામે સાવચેત રહેવા, પૂરતા પ્રમાણમાં પાણી પીવા, હાઇડ્રેટેડ રહેવા અને ખાસ કરીને બપોરના સમયે સીધા સૂર્યપ્રકામાં સખત શારીરિક શ્રમ ન કરવાની ખાસ અપીલ કરી છે.

આ ભયાનક ગરમીની સૌથી વધુ અસર દિલ્હી, પંજાબ, હરિયાણા અને ચંદીગઢ જેવા રાજ્યોમાં જોવા મળશે, જ્યાં આગામી ચારથી પાંચ દિવસ સુધી સૂર્યદેવતા પ્રકોપ વરસાવશે. દિલ્હીમાં તાજેતરમાં જ સરેરાશ તાપમાન ૪૦.૮ ડિગ્રી નોંધાયું હતું, જ્યારે રિજ હવામાન કેન્દ્ર ખાતે પારો ઓલરેડી ૪૨.૪ ડિગ્રીને પાર કરી ચૂક્યો છે. પ્રાદેશિક પવનની પેટર્નમાં આવેલા આ મોટા ફેરફારના લીધે હવે સમગ્ર મેદાની વિસ્તારો કાયદેસર ભઠ્ઠીની જેમ શેકાઈ રહ્યા છે.
આગાહીકારોના મતે, આગામી દિવસોમાં ઉત્તર-પશ્ચિમ ભારતના મેદાની ભાગોમાં સરેરાશ તાપમાનમાં હજુ પણ ૩ થી ૫ ડિગ્રી સેલ્સિયસનો તોતિંગ વધારો ઝીંકાઈ શકે છે. આ દરમિયાન દિવસના સમયે ૨૦ થી ૩૦ કિલોમીટર પ્રતિ કલાકની ઝડપે ગરમ પવનો ફૂંકાશે, જેની મહત્તમ ગતિ ૪૦ કિલોમીટર સુધી પહોંચી શકે છે. સૌથી ચિંતાજનક બાબત એ છે કે સૂર્યાસ્ત પછી પણ લઘુત્તમ તાપમાન ઊંચું રહેવાના કારણે લોકોને રાત્રિના સમયે પણ કોઈ રાહત નહીં મળે અને અસહ્ય બફારા સાથે ગરમ આબોહવાનો સામનો કરવો પડશે.
ખાનગી હવામાન એજન્સી સ્કાયમેટ વેધરના પ્રમુખ મહેશ પાલાવતે આ કુદરતી સ્થિતિ અંગે મીડિયાને જણાવ્યું છે કે, બંગાળની ખાડી તરફથી આવતા પૂર્વીય ભેજવાળા પવનોને બદલે હવે પશ્ચિમના સૂકા અને ગરમ પવનોએ જોર પકડ્યું છે. આ ભૌગોલિક ફેરફારના કારણે વાતાવરણમાંથી ભેજ ગાયબ થઈ ગયો છે અને શુષ્ક ગરમી વધી ગઈ છે. આગામી મંગળવારથી આ હીટવેવની તીવ્રતા વધુ આકરી બનશે, જેના કારણે પરિવહન, મજૂરો અને ખુલ્લા આકાશ નીચે કામ કરતા લોકો માટે સ્વાસ્થ્યનું મોટું જોખમ ઊભું થઈ ગયું છે.