કેદારનાથમાં શ્રદ્ધાળુઓનો ભારે ધસારોઃ દર્શન માટે કલાકો સુધી લાંબી કતારો
બાબા કેદારના દર્શન માટે દેશના વિવિધ વિસ્તારોમાંથી મોટી સંખ્યામાં યાત્રાળુઓ પહોંચી રહ્યા છે
કેદારનાથ ધામ,તા.૫: ઉત્તરાખંડના રુદ્રપ્રયાગ જિલ્લામાં આવેલા પ્રસિદ્ધ કેદારનાથ ધામમાં હાલ શ્રદ્ધાળુઓની ભારે ભીડ જોવા મળી રહી છે. બાબા કેદારના દર્શન માટે દેશના વિવિધ વિસ્તારોમાંથી મોટી સંખ્યામાં યાત્રાળુઓ પહોંચી રહ્યા છે. ભક્તોની સંખ્યા વધતા મંદિર પરિસર અને દર્શન માર્ગ પર લાંબી કતારો જોવા મળી રહી છે.
કેદારનાથમાં દર્શન માટે પહોંચેલા શ્રદ્ધાળુઓને લાંબા સમય સુધી પોતાની વારીની રાહ જોવી પડી રહી છે. આસ્થા પથથી લઈને મંદિરના મુખ્ય પ્રવેશદ્વાર સુધી ભક્તોની કતાર જોવા મળી રહી છે. સવારથી શરૂ થતી આ રાહ ઘણી વખત સાંજ સુધી પણ ચાલુ રહે છે. ભારે ભીડ છતાં ભક્તોમાં બાબા કેદારના દર્શનને લઈને ઉત્સાહ યથાવત્ જોવા મળી રહ્યો છે.
મુખ્ય પ્રવેશદ્વાર પરથી દર્શનમાં વિલંબ થતાં મોટી સંખ્યામાં શ્રદ્ધાળુઓ VIP ગેટ તરફ પણ પહોંચી રહ્યા છે. અહીં ભીડ વધવાને કારણે કેટલીક વખત ધક્કામુક્કીની સ્થિતિ સર્જાઈ રહી છે. VIP ગેટ આસપાસની ભીડને નિયંત્રિત કરવી પણ તંત્ર માટે પડકારરૂપ બની રહી છે.
એક તરફ કેદારનાથમાં શ્રદ્ધાનો માહોલ છે, તો બીજી તરફ આટલી મોટી સંખ્યામાં પહોંચતા યાત્રાળુઓને સંભાળવાની વ્યવસ્થા અંગે પણ સવાલો ઊભા થઈ રહ્યા છે. લાંબી કતારો અને કલાકો સુધી રાહ જોવાને કારણે શ્રદ્ધાળુઓને મુશ્કેલી પડી રહી છે. આવી સ્થિતિમાં ભીડને યોગ્ય રીતે નિયંત્રિત કરવા અને દર્શન વ્યવસ્થા સરળ બનાવવા પર વધુ ધ્યાન આપવાની જરૂરિયાત સામે આવી છે.
કેદારનાથમાં દરરોજ મોટી સંખ્યામાં શ્રદ્ધાળુઓ બાબા કેદારના દર્શન માટે પહોંચી રહ્યા છે. આવી સ્થિતિમાં બદ્રી-કેદાર મંદિર સમિતિ અને રુદ્રપ્રયાગ વહીવટી તંત્ર સામે ભીડ વ્યવસ્થાપન સૌથી મોટો પડકાર બની રહ્યો છે. યાત્રાળુઓને રાહત મળે, લાંબી કતારોનું યોગ્ય સંચાલન થાય અને દર્શન પ્રક્રિયા સરળતાથી ચાલે તે માટે અસરકારક વ્યવસ્થા જરૂરી બની છે.
(9:53 AM IST)
છેલ્લા 8 દિવસમાં સૌથી લોકપ્રિય 
