તેલ અવીવ: મધ્ય પૂર્વમાં ચાલી રહેલા સંઘર્ષ વચ્ચે હિઝબુલ્લાહે પોતાની સૈન્ય શક્તિનું નવું પ્રદર્શન કરીને દુનિયાભરના લશ્કરી વિશ્લેષકોને અચંબામાં મૂકી દીધા છે. અત્યાર સુધી એવી ધારણા હતી કે ઇઝરાયલના સતત હુમલાઓને કારણે હિઝબુલ્લાહ પાયમાલ થઈ ગયું છે અને તેની શસ્ત્રાગાર ક્ષમતા ખતમ થઈ ગઈ છે, પરંતુ છેલ્લા એક મહિનાથી ઇઝરાયલી વિસ્તારોમાં થઈ રહેલા તોબડતોડ રોકેટ હુમલાઓએ આ ધારણાને ધરખમ રીતે નકારી કાઢી છે. હિઝબુલ્લાહે સાબિત કરી દીધું છે કે તે માત્ર નબળું નથી પડ્યું, પરંતુ તેણે પોતાની રણનીતિમાં ધરમૂળથી ફેરફાર કરીને વધુ ચપળ અને ઘાતક નાના એકમોમાં વિભાજિત થઈને હુમલા તેજ કર્યા છે.
ઇઝરાયલના વડાપ્રધાન બેન્જામિન નેતન્યાહૂએ સ્પષ્ટ કર્યું છે કે લેબનોન સરકાર સાથે ગમે તેટલી વાટાઘાટો ચાલે, પરંતુ ઇઝરાયલ હિઝબુલ્લાહના સશસ્ત્ર એકમો પરના હુમલા રોકશે નહીં. બીજી તરફ, ઇન્ટેલિજન્સ અહેવાલો સૂચવે છે કે હિઝબુલ્લાહે માત્ર રોકેટ અને મિસાઇલોનો મોટો જથ્થો જાળવી રાખ્યો નથી, પરંતુ યુદ્ધના સમયગાળા દરમિયાન પણ સ્થાનિક સ્તરે શસ્ત્રોનું ઉત્પાદન ચાલુ રાખ્યું છે. પશ્ચિમી અને આરબ અધિકારીઓના મતે, 15 મહિનાનો યુદ્ધવિરામ હિઝબુલ્લાહ માટે લડાઈનો અંત નહીં, પરંતુ બીજા રાઉન્ડની તૈયારી માટેની એક સુવર્ણ તક સાબિત થયો છે, જેનો ઉપયોગ તેણે ફરીથી જૂથબંધી અને પુનઃનિર્માણ માટે કર્યો છે.
આંતરરાષ્ટ્રીય ક્રાઇસિસ ગ્રુપના નિષ્ણાતો માને છે કે હિઝબુલ્લાહ ખતમ થઈ ગયું હોવાની વ્યાપક માન્યતા એક મોટી ભૂલ હતી. હાલમાં જે રીતે ડ્રોન અને મિસાઇલ હુમલાઓનું સંકલન થઈ રહ્યું છે તે જોતા લાગે છે કે આ આતંકી સંગઠન હવે પહેલા કરતા વધુ જોખમી બન્યું છે. ઇઝરાયલે લેબનોન સરહદે પોતાની સુરક્ષા વ્યવસ્થા વધુ સખત બનાવી છે, તેમ છતાં હિઝબુલ્લાહના અચાનક થતા હુમલાઓએ સરહદી વિસ્તારોમાં રહેતા નાગરિકો અને સૈન્ય છાવણીઓ માટે મોટો પડકાર ઉભો કર્યો છે. આગામી દિવસોમાં આ સંઘર્ષ વધુ ભીષણ બને તેવી પૂરેપૂરી શક્યતાઓ દેખાઈ રહી છે.