અલીપુરદ્વાર : ભૂટાનમાં હિમનદી તળાવ ફાટવાની આશંકા અને અચાનક પૂરની ચેતવણીને પગલે પશ્ચિમ બંગાળના અલીપુરદ્વાર અને જલપાઈગુડી જિલ્લામાં ભારે હલચલ મચી ગઈ હતી, જેના પગલે વહીવટીતંત્ર અને સ્થાનિક નાગરિકો દ્વારા માત્ર ૩૦ મિનિટના ટૂંકા સમયગાળામાં હજારો ગ્રામજનોને તાત્કાલિક સુરક્ષિત આશ્રયસ્થાનોમાં ખસેડવામાં આવ્યા હતા.

પ્રાપ્ત વિગતો અનુસાર, ગુરુવારે સાંજે ભૂટાનથી મળેલી કટોકટીની ચેતવણી બાદ સંકોશ નદીના કિનારે આવેલા ગ્રામીણ વિસ્તારોમાં ફફડાટ વ્યાપી ગયો હતો, અને શનિવાર સવારથી નદીમાં મૃત માછલીઓ તથા ગંદુ પાણી વહેતું જોવા મળતાં પૂરની ભયાનક સ્થિતિ સ્પષ્ટ થઈ હતી.

ઘટનાની વિગતવાર માહિતી આપતા પ્રત્યક્ષદર્શીઓ અને સ્થાનિક રહેવાસી વિવેક છેત્રીએ જણાવ્યું હતું કે ભૂટાનમાં રહેતા તેમના સંબંધીઓ દ્વારા પાણીના વધતા સ્તરની જાણ કરવામાં આવતાં જ ગ્રામજનોએ વોટ્સએપ ગ્રુપના માધ્યમથી તાત્કાલિક એલર્ટ આપીને મહિલાઓ અને બાળકો સહિત અંદાજે ૧,૨૦0 જેટલા લોકોને સુરક્ષિત સ્થળે ખસેડી લીધા હતા.

ભૂતકાળમાં પણ હિમાલયી ક્ષેત્રોમાં હિમનદી તળાવો ફાટવાની ઘટનાઓને કારણે નીચાણવાળા વિસ્તારોમાં ભારે તારાજી સર્જાઈ હોવાના ઇતિહાસને ધ્યાનમાં રાખીને તંત્ર દ્વારા આ વખતે તાત્કાલિક પગલાં લેવામાં આવ્યા છે અને સમગ્ર ઉત્તર બંગાળમાં કટોકટીની સ્થિતિ જાહેર કરવામાં આવી છે.

હાલમાં નદીના જળસ્તર અને પરિસ્થિતિ પર સતત નજર રાખવામાં આવી રહી છે, તથા વહીવટીતંત્ર દ્વારા રાહત અને બચાવ કામગીરીને વધુ સઘન બનાવીને અસરગ્રસ્તોને જરૂરી સહાય પૂરી પાડવાની તૈરીઓ પૂર્ણ કરવામાં આવી છે.

આગામી સમયમાં આ જોખમી હિમનદી તળાવોની કાયમી સુરક્ષા અને પૂર નિયંત્રણ માટે વિશેષ વૈજ્ઞાનિક પગલાં લેવામાં આવશે તેવી અપેક્ષા વ્યક્ત કરવામાં આવી રહી છે જેથી ભવિષ્યમાં આવી આપત્તિઓથી બચી શકાય.