મુંબઈ: ૧૯૯૩ના મુંબઈ સીરીયલ બોમ્બ બ્લાસ્ટ કેસના કુખ્યાત ગુનેગાર અબુ સાલેમને બોમ્બે હાઇકોર્ટ તરફથી મોટો ઝટકો લાગ્યો છે. પોતાની ૨૫ વર્ષની સજા પૂરી થઈ હોવાનો દાવો કરીને જેલમાંથી વહેલા મુક્ત થવા માટે સાલેમે કરેલી અરજીને હાઇકોર્ટે ફગાવી દીધી છે. જસ્ટિસ અજય ગડકરી અને જસ્ટિસ કમલ ખાતાની બેન્ચે સ્પષ્ટ કર્યું હતું કે, કેદીની મુક્તિ કે માફી અંગેનો નિર્ણય નિર્ધારિત સમયના એક મહિના પહેલા લેવામાં આવતો હોય છે, તેથી અત્યારે આવી કોઈ પણ ટિપ્પણી કરવી અકાળ ગણાશે.
અબુ સાલેમે દલીલ કરી હતી કે ભારત અને પોર્ટુગલ વચ્ચેના પ્રત્યાર્પણ કરાર મુજબ તેને ૨૫ વર્ષથી વધુ સજા કરી શકાય નહીં અને તેણે માફી સાથે આ સમયગાળો પૂર્ણ કરી લીધો છે. જોકે, કોર્ટે આ તબક્કે તેને કોઈ પણ રાહત આપવાનો ઇનકાર કર્યો છે.
 
સરકારનો વળતો પ્રહાર: 'ગણતરી જ ખોટી છે'
મહારાષ્ટ્ર સરકારે કોર્ટમાં સોગંદનામું રજૂ કરીને સાલેમના દાવાઓની હવા કાઢી નાખી હતી. સરકારે જણાવ્યું કે:
•    સજાનો સમયગાળો: ૩૧ માર્ચ, ૨૦૨૫ સુધીમાં સાલેમે માત્ર ૧૯ વર્ષ અને ૫ મહિનાની જ સજા ભોગવી છે. ૨૫ વર્ષ પૂરા થયા હોવાની તેની વાત નિયમો વિરુદ્ધ છે.
•    ગંભીર ગુનાહિત ઇતિહાસ: સાલેમનો ભૂતકાળ અત્યંત ભયાનક અને ગુનાહિત રહ્યો છે, જેને ધ્યાનમાં લેતા તેની વહેલી મુક્તિ સમાજ માટે જોખમી બની શકે છે.
•    મુક્તિની સંભવિત તારીખ: સરકારની ગણતરી મુજબ, અબુ સાલેમને '૫૦ વર્ષની શ્રેણી'માં રાખવામાં આવ્યો છે અને તેની સંભવિત મુક્તિ તારીખ ૩૧ જાન્યુઆરી, ૨૦૪૬ હોઈ શકે છે.
 
શું છે ૨૫ વર્ષની સજાનો વિવાદ?
વર્ષ ૨૦૦૨માં જ્યારે સાલેમને પોર્ટુગલથી ભારત લાવવામાં આવ્યો, ત્યારે ભારત સરકારે ખાતરી આપી હતી કે તેને ફાંસીની સજા આપવામાં આવશે નહીં અને તેની જેલવાસની સજા ૨૫ વર્ષથી વધુ નહીં હોય. સાલેમ આ જ કરારનો સહારો લઈને જેલના સળિયા પાછળથી બહાર આવવા મથામણ કરી રહ્યો છે.
જોકે, હાઇકોર્ટે ટાંક્યું છે કે સુપ્રીમ કોર્ટના આદેશો મુજબ મુક્તિની ગણતરીનો ચોક્કસ સમય હોય છે. અત્યારે સાલેમની મુક્તિ માટે કોઈ આદેશ આપી શકાય નહીં. આ ચુકાદા બાદ હવે સાલેમે હજુ લાંબો સમય જેલના સળિયા પાછળ વિતાવવો પડશે તે નક્કી છે. મુંબઈના નિર્દોષ નાગરિકોના લોહીથી ખરડાયેલા હાથ ધરાવતા આ ગુનેગારને કોઈ પણ સંજોગોમાં વહેલી મુક્તિ ન મળે તે માટે સરકાર મક્કમ દેખાઈ રહી છે.