નવી દિલ્હી:   દિલ્હીના હૃદયસમા કનોટ પ્લેસ વિસ્તારમાં આજે ભારે રાજકીય ગરમાવો અને ડ્રામા જોવા મળ્યો હતો. કોકરોચ જનતા પાર્ટી (CJP) દ્વારા કનોટ પ્લેસના સેન્ટ્રલ પાર્કમાં યોજવામાં આવેલી વિવાદાસ્પદ 'લહેરા દો તિરંગા' માર્ચના વિરોધમાં પાલિકા બજારના સ્થાનિક વેપારીઓ અને દુકાનદારો સામસામે રસ્તા પર ઉતરી આવ્યા હતા. CJP દ્વારા મુખ્ય ચૂંટણી કમિશનર જ્ઞાનેશ કુમારના રાજીનામાની માંગ સાથે વિરોધ પ્રદર્શનનું આહ્વાન કરવામાં આવ્યું હતું, જેની સામે પાલિકા બજારના વેપારીઓએ મુખ્ય ચૂંટણી કમિશનર અને દિલ્હી પોલીસના ખુલ્લા સમર્થનમાં આક્રમક સૂત્રોચ્ચાર કરીને વિરોધ પ્રદર્શનનો વિરોધ કર્યો હતો.

કનોટ પ્લેસ પહોંચેલા વેપારીઓના જૂથે "જ્ઞાનેશ કુમારને ભારત રત્ન મળવો જોઈએ" અને "મોદી, મોદી" ના જોરદાર નારા લગાવ્યા હતા. આ સાથે જ કાયદો અને વ્યવસ્થા જાળવી રાખવા બદલ દિલ્હી પોલીસના સમર્થનમાં પણ વેપારીઓ દ્વારા નારેબાજી કરવામાં આવી હતી. માધ્યમો સાથેની વાતચીતમાં એક સ્થાનિક વેપારીએ સ્પષ્ટ કર્યું હતું કે, રાષ્ટ્રધ્વજ તિરંગો લહેરાવવો એ દેશના દરેક નાગરિકનો અધિકાર છે અને તેમાં કોઈ ખોટું નથી, પરંતુ તિરંગા યાત્રાના નામે રાજધાનીના મુખ્ય વેપારી મથકે અરાજકતા ફેલાવવાની અને શાંતિ ડહોળવાની મંજૂરી કોઈને આપી શકાય નહીં.

બીજી તરફ, આ વિરોધ પ્રદર્શનને પગલે દિલ્હી પોલીસ દ્વારા કડક સુરક્ષા બંદોબસ્ત ગોઠવવામાં આવ્યો હતો. 'તિરંગા માર્ચ' શરૂ થવાના ગણતરીના સમય પહેલાં જ CJP ના સ્થાપક અભિજિત દીપકની તેમના નિવાસસ્થાનેથી નીકળતા જ દિલ્હી પોલીસે અટકાયત કરી લીધી હતી. અભિજિતની અટકાયત બાદ પણ બારખંભા રોડ નજીક વિરોધ કરી રહેલા ડાબેરી વિદ્યાર્થી સંગઠનો અને ઓલ ઈન્ડિયા સ્ટુડન્ટ્સ એસોસિએશન (AISA) ના પ્રમુખ નેહા બોરાની પણ પોલીસે અટકાયત કરી હતી. આમ, CJP અને ડાબેરી સંગઠનોના વિરોધ વચ્ચે પાલિકા બજારના દુકાનદારોનું સીઈસી જ્ઞાનેશ કુમાર અને દિલ્હી પોલીસના સમર્થનમાં રસ્તા પર ઉતરવું એ સમગ્ર કનોટ પ્લેસમાં ચર્ચાનો મુખ્ય વિષય બન્યો હતો.