ગુવાહાટી: આસામના રાજકારણમાં છેલ્લા કેટલાય સમયથી ચાલી રહેલી અટકળોનો અંત આવ્યો છે અને ફરી એકવાર હિમંત બિસ્વા શર્મા પર પક્ષે કળશ ઢોળ્યો છે. ગુવાહાટીમાં યોજાયેલી ભારતીય જનતા પાર્ટીના ધારાસભ્ય પક્ષની મહત્વની બેઠકમાં હિમંત બિસ્વા શર્માને સર્વાનુમતે નેતા તરીકે ચૂંટવામાં આવ્યા છે. પક્ષના તમામ નવા ચૂંટાયેલા ધારાસભ્યોએ તેમને સમર્થન જાહેર કરતા હવે તેઓ ફરીથી આસામના મુખ્યમંત્રી તરીકે સત્તાના સૂત્રો સંભાળશે. આ બેઠક બાદ તેમને રાષ્ટ્રીય લોકશાહી જોડાણ (NDA) ના નેતા તરીકે પણ ઔપચારિક રીતે જાહેર કરવામાં આવ્યા છે.

આ મહત્વની પસંદગી પ્રક્રિયા માટે ભાજપ હાઈકમાન્ડ દ્વારા કેન્દ્રીય મંત્રી જેપી નડ્ડા અને હરિયાણાના મુખ્યમંત્રી નાયબ સિંહ સૈનીની નિરીક્ષક તરીકે નિમણૂક કરવામાં આવી હતી. તેમની હાજરીમાં મળેલી બેઠકમાં હિમંત બિસ્વા શર્માના નામનો પ્રસ્તાવ મૂકવામાં આવ્યો હતો, જેને તમામ સભ્યોએ હર્ષનાદ સાથે વધાવી લીધો હતો. પક્ષના આ નિર્ણય સાથે જ આસામમાં નવી સરકારની રચનાની તૈયારીઓ તેજ બની ગઈ છે અને વહીવટીતંત્ર દ્વારા શપથ ગ્રહણ સમારોહ માટેની ભવ્ય આયોજનની રૂપરેખા તૈયાર કરવામાં આવી રહી છે.

હિમંત બિસ્વા શર્મા આગામી ૧૨ મેના રોજ મુખ્યમંત્રી તરીકે પદ અને ગોપનીયતાના શપથ લેશે. આ સમારોહને યાદગાર બનાવવા માટે વડાપ્રધાન નરેન્દ્ર મોદી ખાસ ઉપસ્થિત રહેવાના છે, જે પક્ષ અને સરકાર માટે આસામનું મહત્વ દર્શાવે છે. હિમંત બિસ્વા શર્માની સંગઠન પરની પકડ અને વહીવટી કુશળતાને ધ્યાનમાં રાખીને પક્ષે ફરી એકવાર તેમનામાં વિશ્વાસ વ્યક્ત કર્યો છે, જેનાથી આગામી પાંચ વર્ષમાં રાજ્યના વિકાસને નવી ગતિ મળશે તેવી અપેક્ષા રાખવામાં આવી રહી છે.