ગાંધીનગર :કેન્દ્રીય ગૃહ અને સહકાર મંત્રી અમિતભાઈ શાહ આગામી 16 અને 17 મે દરમિયાન પોતાના સંસદીય મતવિસ્તાર ગાંધીનગરની મુલાકાતે આવશે આ બે દિવસીય પ્રવાસ દરમિયાન તેઓ કરોડોના વિકાસ કાર્યોનું લોકાર્પણ કરવાની સાથે સંગઠન અને વહીવટી તંત્ર સાથે મહત્વની બેઠકો યોજીને જનકલ્યાણની યોજનાઓની સમીક્ષા કરશે.

કેન્દ્રીય ગૃહમંત્રી અમિતભાઈ  શાહના ગુજરાત પ્રવાસને લઈને વહીવટી તંત્ર અને રાજકીય આલમમાં ભારે ઉત્સાહ જોવા મળી રહ્યો છે. 16 મેના રોજ પ્રવાસના પ્રારંભે તેઓ ગાંધીનગર લોકસભા ક્ષેત્રમાં ચાલી રહેલા વિવિધ વિકાસલક્ષી પ્રોજેક્ટ્સની પ્રગતિની ઝીણવટભરી સમીક્ષા કરશે. આ પ્રવાસનો એક મુખ્ય ઉદ્દેશ્ય બાળકોના સર્વાંગી વિકાસ માટે શરૂ કરવામાં આવેલા "રમશે બાળક, ખીલશે બાળક" અભિયાનને વેગ આપવાનો છે. અમિતભાઈ  શાહ આ અભિયાનના ઇનચાર્જ અને સંબંધિત અધિકારીઓ સાથે વિશેષ બેઠક યોજીને અત્યાર સુધીની કામગીરીનો ચિતાર મેળવશે અને ભવિષ્યના આયોજન અંગે જરૂરી માર્ગદર્શન પૂરું પાડશે. આ અભિયાન દ્વારા છેવાડાના બાળકોને રમતગમત અને અન્ય પ્રવૃત્તિઓ માટે યોગ્ય પ્લેટફોર્મ પૂરું પાડવાનો લક્ષ્યાંક છે.

ત્યારબાદ, તેઓ અમદાવાદ મ્યુનિસિપલ કોર્પોરેશન (AMC) ના નવા ચૂંટાયેલા હોદ્દેદારો સાથે બેઠક યોજશે, જેમાં શહેરના વિકાસના પડકારો અને આધુનિક સુવિધાઓના નિર્માણ અંગે ચર્ચા કરવામાં આવશે. રાજકીય દ્રષ્ટિએ પણ આ પ્રવાસ મહત્વનો છે, કારણ કે તેઓ ઘાટલોડિયા, વેજલપુર, સાબરમતી અને નારણપુરા વિધાનસભા મતવિસ્તારના નવા કાઉન્સિલરો સાથે સીધો સંવાદ કરશે. આ બેઠક દ્વારા પાયાના સ્તરે લોકપ્રશ્નોના ઉકેલ અને સરકારી યોજનાઓના અમલીકરણ પર ભાર મૂકવામાં આવશે.

પ્રવાસના બીજા દિવસે એટલે કે 17 મેના રોજ, અમિત શાહના હસ્તે ગાંધીનગર અને અમદાવાદ વિસ્તારમાં અનેક વિકાસલક્ષી કાર્યોનું લોકાર્પણ અને ખાતમુહૂર્ત કરવામાં આવશે. આ પ્રોજેક્ટ્સમાં માળખાગત સુવિધાઓ, આરોગ્ય અને શિક્ષણને લગતા કામોનો સમાવેશ થાય છે, જે સ્થાનિક નાગરિકોના જીવનધોરણમાં સુધારો લાવશે. ગૃહમંત્રીની આ મુલાકાત માત્ર વિકાસ કાર્યો પૂરતી સીમિત નથી, પરંતુ તે કાર્યકરોમાં નવો જોમ ભરવા અને પ્રજાલક્ષી કાર્યોને ગતિ આપવા માટેનો એક મહત્વપૂર્ણ માધ્યમ બની રહેશે. સતત જનસંપર્ક અને વિકાસની રાજનીતિને વરેલા અમિતભાઈ  શાહનો આ પ્રવાસ ગાંધીનગર લોકસભા વિસ્તારને મોડેલ મતવિસ્તાર બનાવવાની દિશામાં વધુ એક મક્કમ ડગલું સાબિત થશે.