તિરુનેલવેલી : ભારતીય શિક્ષણ જગત અને ખાસ કરીને ઉચ્ચ અભ્યાસ ક્ષેત્ર સાથે જોડાયેલા એક અત્યંત સંવેદનશીલ અને ચિંતાજનક સમાચાર સામે આવ્યા છે. તમિલનાડુની ૧૩૧ વર્ષ જૂની ઐતિહાસિક સારાહ ટકર કોલેજમાં પીએચડીનું માર્ગદર્શન પૂરું પાડવા બદલ એક પ્રોફેસર દ્વારા સંશોધન વિદ્વાન (રિસર્ચ સ્કોલર) પાસે એક લાખ રૂપિયાની તોતિંગ લાંચ માંગવામાં આવી હોવાનો ચોંકાવનારો માફો પ્રકાશમાં આવ્યો છે. આ ગંભીર કૌભાંડ સામે આવ્યા બાદ સંબંધિત પ્રોફેસરને સસ્પેન્ડ તો કરી દેવામાં આવ્યા છે, પરંતુ આ ઘટનાએ સમગ્ર દેશના પીએચડી વિદ્વાનોની દયનીય અને ચિંતાજનક વાસ્તવિકતાને ઉજાગર કરી દીધી છે કે આખરે ડોક્ટરેટ જેવું ગૌરવવંતુ શિક્ષણ મેળવવું ક્યારે પ્રોફેસરને ખુશ કરવા અને ખુશામત કરવાની કવાયત બની ગયું?

શૈક્ષણિક સંસ્થાઓમાં ચાલી રહેલા આ કથિત શોષણની ગંભીરતાને ધ્યાનમાં રાખીને 'ફોકસ તમિલનાડુ' ના વિશેષ અહેવાલમાં સંશોધન વિદ્વાનો સામે થતા અન્યાયની પિછોડી ઉઘાડવામાં આવી છે. રિપોર્ટ અનુસાર, દેશના અનેક ભાગોમાં પીએચડી સ્કોલર્સ પાસેથી બળજબરીથી લાંચ લેવી, મોંઘી ભેટો પડાવવી, પ્રોફેસરના ઘેર અંગત કામકાજ કરાવવા અને માનસિક ઉત્પીડન કરવાનો સિલસિલો લાંબા સમયથી અવિરતપણે ચાલી રહ્યો છે. આશ્ચર્યની વાત તો એ છે કે સરકાર દ્વારા આ બાબતે કડક માર્ગદર્શિકાઓ બહાર પાડવામાં આવી છે અને અદાલતો દ્વારા પણ અનેકવાર હસ્તક્ષેપ કરવામાં આવ્યો છે, છતાં પણ ઉચ્ચ શિક્ષણ ક્ષેત્રમાં ભ્રષ્ટાચાર અને શોષણની આ ઘાતક સંસ્કૃતિ ડામવામાં તંત્ર નિષ્ફળ સાબિત થઈ રહ્યું છે.

આ ઘટનાએ બુદ્ધિજીવી વર્ગ અને શૈક્ષણિક જગતમાં ગંભીર ચિંતા ફેલાવી દીધી છે. લાખો સપનાં સાથે રિસર્ચ ક્ષેત્રે ઝંપલાવતા તેજસ્વી યુવાનો જ્યારે આ પ્રકારના ભ્રષ્ટ અને શોષણયુક્ત વાતાવરણનો ભોગ બને છે, ત્યારે તેમની માનસિક સ્થિતિ અને કારકિર્દી બંને દાવ પર લાગી જાય છે. શિક્ષણના પવિત્ર મંદિરોમાં વેપારીકરણ અને દૂષણો વધી રહ્યા છે ત્યારે આ મામલે માત્ર સસ્પેન્શન જેવા પગલાં પૂરતા નથી, પરંતુ સમગ્ર સિસ્ટમમાં ક્રાંતિકારી સુધારા લાવવાની તાતી જરૂરિયાત છે જેથી કોઈ માસૂમ રિસર્ચ સ્કોલરે આવા માનસિક ત્રાસ કે આર્થિક શોષણનો શિકાર ન બનવું પડે.