બ્રિસ્ટલ:  બ્રિટનના બ્રિસ્ટલ શહેરમાં આજે વહેલી સવારે એક રહેણાંક મકાનમાં થયેલા પ્રચંડ વિસ્ફોટે સમગ્ર વિસ્તારને હચમચાવી દીધો છે. આ દુર્ઘટનામાં બે વ્યક્તિઓના કરુણ મોત નીપજ્યા હોવાની પુષ્ટિ પોલીસે કરી છે. વિસ્ફોટની ગંભીરતાને જોતા વહીવટી તંત્ર દ્વારા ‘મેજર ઇન્સિડન્ટ’ (મોટી દુર્ઘટના) જાહેર કરવામાં આવી છે અને સ્થળ પર બોમ્બ નિકાલ દસ્તા (Bomb Squad) ને બોલાવવાની ફરજ પડી છે.

 વહેલી સવારે સર્જાયો મોતનો તાંડવ:

બ્રિસ્ટલના સ્ટર્નકોર્ટ રોડ પર આજે સવારે આશરે 6:30 વાગ્યાની આસપાસ એક મકાનમાં જોરદાર ધડાકો થયો હતો. આ વિસ્ફોટ એટલો ભયાનક હતો કે મકાનનો કેટલોક ભાગ ધરાશાયી થઈ ગયો હતો અને તેમાં રહેતા બે લોકોના સ્થળ પર જ મોત થયા હતા. ઘટનાની જાણ થતા જ એવન અને સોમરસેટ પોલીસ સહિતની ઇમરજન્સી સેવાઓ કાફલા સાથે ઘટનાસ્થળે દોડી આવી હતી. સાવચેતીના ભાગરૂપે આસપાસના મકાનો ખાલી કરાવી રહીશોને સુરક્ષિત સ્થળે ખસેડવામાં આવ્યા છે.

 ઘટના શંકાસ્પદ પણ આતંકી કાવતરું નહીં:

પોલીસના જણાવ્યા અનુસાર, હાલ આ વિસ્ફોટના કારણો ‘શંકાસ્પદ’ જણાઈ રહ્યા છે, જોકે પ્રાથમિક તપાસમાં આ ઘટના આતંકવાદ સાથે જોડાયેલી હોવાના કોઈ પુરાવા મળ્યા નથી. પોલીસ પ્રવક્તાએ સ્પષ્ટતા કરી હતી કે, બ્રિટનમાં હાલના સુરક્ષાના સ્તરને ધ્યાનમાં રાખીને જનતાને આશ્વાસન આપવામાં આવે છે કે આ કોઈ આતંકવાદી હુમલો નથી. પોલીસે વધુમાં ઉમેર્યું હતું કે તેઓ હાલ આ કેસમાં અન્ય કોઈ શંકાસ્પદ વ્યક્તિની શોધખોળ કરી રહ્યા નથી, જે સૂચવે છે કે વિસ્ફોટ પાછળના કારણો સ્થાનિક સ્તરના હોઈ શકે છે.

 તપાસનો ધમધમાટ અને તંત્રની અપીલ:

ઘટનાસ્થળે બોમ્બ સ્ક્વોડ દ્વારા ઝીણવટભરી તપાસ હાથ ધરવામાં આવી છે જેથી વિસ્ફોટ માટે કયા પ્રકારના પદાર્થનો ઉપયોગ થયો હતો તે જાણી શકાય. અન્ય મિલકતોને કોઈ મોટું નુકસાન થયું નથી, પરંતુ સાવચેતીના ભાગરૂપે સમગ્ર વિસ્તારને કોર્ડન કરી લેવામાં આવ્યો છે. પોલીસે લોકોને અપીલ કરી છે કે તેઓ આ ઘટના અંગે કોઈ પણ પ્રકારની અફવાઓ ન ફેલાવે અને તપાસમાં સહકાર આપે. વિસ્ફોટના મૂળ સુધી પહોંચવા માટે ફોરેન્સિક ટીમો પણ કામે લાગી છે.