દેવાસ: સ્વતંત્રતા દિવસની પૂર્વસંધ્યાએ મધ્યપ્રદેશના દેવાસ જિલ્લાના વિજયગંજ મંડી વિસ્તારમાં ભારતીય જનતા પાર્ટી દ્વારા આયોજિત તિરંગા બાઈક યાત્રામાં ડીજેનું વાહન ઝાડ સાથે અથડાતા મધમાખીઓએ અચાનક હુમલો કરતા ભારે નાસભાગ મચી ગઈ હતી. આ અણધારી અને ભયાનક દુર્ઘટનામાં દેશભક્તિના માહોલ વચ્ચે રેલીમાં ઉત્સાહભેર જોડાયેલા આશરે ૪૦ થી ૫૦ જેટલા સ્થાનિક કાર્યકરોને મધમાખીઓના ડંખથી ગંભીર ઈજાઓ પહોંચી હતી.

આ ઘટના અંગે સત્તાવાર માહિતી આપતા હુમલામાં ઈજાગ્રસ્ત થયેલા ભાજપ ગ્રામીણ મંડળના પ્રમુખ અતુલ શર્માએ જણાવ્યું કે, આ વિશાળ બાઈક રેલીમાં ૫૦૦થી વધુ કાર્યકરો ભાગ લઈ રહ્યા હતા. આ દરમિયાન યાત્રાની સાથે ચાલતું ડીજેના સાધનો ભરેલું વાહન અચાનક રસ્તાની બાજુમાં આવેલા એક ઝાડ સાથે જોરદાર રીતે ટકરાયું હતું. ઝાડ પર રહેલો વિશાળ મધપૂડો તૂટી પડતા જ સેંકડોની સંખ્યામાં ઉશ્કેરાયેલી મધમાખીઓએ યાત્રામાં સામેલ લોકો પર ત્રાટકીને ભારે આતંક મચાવ્યો હતો.

મધમાખીઓનો આક્રમક હુમલો થતાં જ સમગ્ર વિસ્તારમાં ગભરાટ ફેલાઈ ગયો હતો. સેંકડો મધમાખીઓના ઘાતક ડંખથી બચવા માટે યાત્રામાં સામેલ અનેક લોકોએ પોતાનાં વાહનો રસ્તા પર જ છોડીને આસપાસ આવેલા સોયાબીનના ખેતરોમાં આશરો લેવાની ફરજ પડી હતી. ઘટનાના પગલે આજુબાજુના સ્થાનિક ખેડૂતો પણ મદદ માટે દોડી આવ્યા હતા અને ખેતરોમાં છુપાયેલા કાર્યકરોનું સુરક્ષિત રીતે રેસ્ક્યુ કરવામાં આવ્યું હતું.

રેસ્ક્યુ કરાયેલા તમામ ઘાયલ કાર્યકરોને તાત્કાલિક તબીબી સહાય પૂરી પાડવા સ્થાનિક ક્લિનિક અને જિલ્લા હોસ્પિટલ ખાતે ખસેડવામાં આવ્યા હતા. મહાત્મા ગાંધી જિલ્લા હોસ્પિટલના ફરજ પરના તબીબ ડો. કમલ કિશોરના જણાવ્યા મુજબ, હોસ્પિટલમાં છ ગંભીર ઈજાગ્રસ્તોને લાવવામાં આવ્યા હતા, જેમાં એક વ્યક્તિની હાલત અત્યંત નાજુક હતી જેને અંદાજે ૨૦૦ જેટલી મધમાખીઓએ ડંખ માર્યા હતા. સદનસીબે, તબીબી ટીમ દ્વારા તાત્કાલિક સઘન સારવાર પૂરી પાડવામાં આવતા હાલ તમામ ઘાયલોની સ્વાસ્થ્ય સ્થિતિ સંપૂર્ણપણે સામાન્ય અને નિયંત્રણમાં હોવાનું વહીવટીતંત્ર દ્વારા જાહેર કરવામાં આવ્યું છે.