નવી દિલ્હી : ઓમાનના દરિયાકાંઠે આવેલી આંતરરાષ્ટ્રીય સ્તરે અત્યંત મહત્વપૂર્ણ ગણાતી હોર્મુઝ સામુદ્રધુનીમાંથી પસાર થઈ રહેલા પનામાના ધ્વજ ધરાવતા વાણિજ્યિક જહાજ 'MT ઓન પીસ' પર એક અજ્ઞાત અસ્ત્ર વડે ભયાનક હુમલો કરવામાં આવ્યો છે. મંગળવારે બનેલી આ ઘટનામાં જહાજ પર સવાર ૧૭ ભારતીય નાગરિકો પૈકી ૧૧ ક્રૂ સભ્યો ગંભીર રીતે ઘાયલ થયા છે. દરિયાઈ સુરક્ષા અને મુક્ત વેપાર માટે પડાકારરૂપ આ ઘટના બાદ દેશના વિદેશ મંત્રાલયે તુરંત જ સત્તાવાર નિવેદન બહાર પાડીને આ હુમલાની સખત શબ્દોમાં નિંદા કરી છે.

ઘટનાની વિગતવાર માહિતી આપતા વિદેશ મંત્રાલયે જણાવ્યું હતું કે આ જહાજમાં કુલ ૧૭ ભારતીય નાગરિકો કાર્યરત હતા. હુમલા બાદ સર્જાયેલી ઈમરજન્સી પરિસ્થિતિમાં ઓમાનના સ્થાનિક અધિકારીઓ અને કોસ્ટ ગાર્ડની તાત્કાલિક મદદ મેળવવામાં આવી હતી. ઓમાની સત્તાવાળાઓના સઘન સહયોગથી તમામ ઘાયલ ભારતીય નાવિકોને જહાજમાંથી સુરક્ષિત રીતે બહાર કાઢીને સારવાર અર્થે ઓમાનના ખાસાબ શહેરની હોસ્પિટલમાં ખસેડવામાં આવ્યા છે, જ્યાં હાલ તેમની સારવાર ચાલી રહી છે.

વિદેશ મંત્રાલયે બહાર પાડેલા સત્તાવાર નિવેદનમાં સ્પષ્ટપણે જણાવાયું છે કે, "ઓમાનના દરિયાકાંઠે વાણિજ્યિક જહાજ 'MT ઓન પીસ' પર થયેલા હુમલાની અમે સખત શબ્દોમાં નિંદા કરીએ છીએ. આંતરરાષ્ટ્રીય જળસીમામાં નિર્દોષ નાવિકો અને વેપારી જહાજોને નિશાન બનાવવાની પ્રવૃત્તિઓ તાત્કાલિક ધોરણે બંધ થવી જોઈએ. આ વિસ્તારમાં સતત વધી રહેલી હિંસક ઘટનાઓ અને જહાજો પરના હુમલા પ્રદેશની સ્થિરતા અને વૈશ્વિક વેપાર માટે ગંભીર ચિંતાનો વિષય છે."

દરિયાઈ ક્ષેત્રમાં વધી રહેલા આ તણાવ વચ્ચે ઓમાન સ્થિત ભારતીય દૂતાવાસ પણ સતત સ્થાનિક તંત્ર અને હોસ્પિટલ પ્રશાસનના સંપર્કમાં છે. દૂતાવાસના અધિકારીઓ ઘાયલ ભારતીય ખલાસીઓની સ્થિતિ પર સતત નજર રાખી રહ્યા છે અને તેમના પરિવારજનોને જરૂરી તમામ સહાય અને માહિતી પૂરી પાડી રહ્યા છે. આ ઉપરાંત અન્ય બિન-ઇજાગ્રસ્ત ભારતીય ક્રૂ સભ્યોની સુરક્ષા સુનિશ્ચિત કરવા માટે પણ તમામ જરૂરી રાજદ્વારી પગલાં ભરવામાં આવી રહ્યા છે.

હોર્મુઝની સામુદ્રધુનીમાં ભારતીય નાવિકોને નિશાન બનાવતી અથવા આ વિસ્તારમાં બનેલી આ કોઈ પ્રથમ ઘટના નથી. આ પૂર્વે પણ ૩ ઓક્ટોબરના રોજ કુવૈતી ધ્વજ ધરાવતા તેલ ટેન્કર 'MT કાઝીમાહ III' પર પણ આવો જ એક મિસાઈલ કે ડ્રોન હુમલો થયો હતો, જેમાં સવાર ૫ ભારતીય નાગરિકોને ભારતીય દૂતાવાસ અને સ્થાનિક તંત્રના પ્રશંસનીય પ્રયાસોથી સુરક્ષિત રીતે બચાવી લેવામાં આવ્યા હતા. મધ્ય પૂર્વના દરિયાઈ વિસ્તારમાં છેલ્લા કેટલાક સમયથી સુરક્ષાની સ્થિતિ સતત વણસી રહી છે.

વૈશ્વિક સ્તરે તેલ અને માલસામાનની હેરફેર માટે હોર્મુઝનો રૂટ અત્યંત સંવેદનશીલ અને મહત્વપૂર્ણ માનવામાં આવે છે. વિદેશ મંત્રાલયે ભારપૂર્વક આહ્વાન કર્યું છે કે આંતરરાષ્ટ્રીય જળમાર્ગો પર નેવિગેશન અને દરિયાઈ વેપારની સુરક્ષા પુનઃસ્થાપિત કરવી અત્યંત જરૂરી છે. ભારત સરકાર પોતાના નાગરિકો અને નાવિકોની સુરક્ષા માટે આંતરરાષ્ટ્રીય મંચો પર આ મુદ્દો ઉઠાવી રહી છે અને પ્રદેશમાં શાંતિ સ્થાપવા માટે તમામ સંબંધિત દેશો સાથે સંપર્કમાં છે.