કાંગડા : જમ્મુથી દહેરાદૂન જઈ રહેલી લક્ષ્મી હોલિડેઝની લક્ઝરી બસ (AR 20 B 0962) ગઈકાલે મોડી રાત્રે હિમાચલ પ્રદેશના કાંગડા જિલ્લાના દમતાલ વિસ્તારમાં નારુલા પેટ્રોલ પંપ પાસે નિયંત્રણ ગુમાવતા સર્વિસ લેન પર પલટી ગઈ હતી. આ ગંભીર અકસ્માત સમયે બસમાં કુલ ૫૭ મુસાફરો સવાર હતા, જેમાં અમરનાથ યાત્રાથી પરત ફરી રહેલા શ્રદ્ધાળુઓનો પણ સમાવેશ થાય છે. દુર્ઘટના બાદ ચીસો અને આક્રંદથી વાતાવરણ ગમગીન બની ગયું હતું.

અકસ્માતની જાણ થતા જ સ્થાનિક પોલીસ અને રાહતકર્મીઓ તાત્કાલિક ઘટનાસ્થળે દોડી આવ્યા હતા. પ્રાપ્ત માહિતી મુજબ, આ ઘટનામાં ૧૬ મુસાફરોને ગંભીર ઈજાઓ પહોંચી છે, જેમાંથી બે વ્યક્તિની સ્થિતિ અત્યંત નાજુક હોવાનું જાણવા મળ્યું છે. તમામ ઘાયલોને નજીકની હોસ્પિટલમાં સારવાર માટે દાખલ કરવામાં આવ્યા છે, જ્યાં તબીબોની ટીમ તેમની સઘન સારવાર કરી રહી છે.

પ્રાથમિક તપાસમાં બસ ચાલકે અચાનક કાબૂ ગુમાવતા આ દુર્ઘટના સર્જાઈ હોવાનું બહાર આવ્યું છે. રાષ્ટ્રીય ધોરીમાર્ગ પર સર્વિસ લેનમાં બસ પલટી જવાથી ટ્રાફિક વ્યવહાર પણ ખોરવાયો હતો. તંત્ર દ્વારા ઘટનાસ્થળે પહોંચીને મુસાફરોના સામાનની સુરક્ષા અને અકસ્માત પાછળના ચોક્કસ કારણોની તપાસ કરવામાં આવી રહી છે.

હાલમાં તમામ ઘાયલોને યોગ્ય સારવાર મળી રહે તે માટે વહીવટીતંત્ર સતત દેખરેખ રાખી રહ્યું છે. અકસ્માત બાદ બસ કંપનીની બેદરકારી છે કે અન્ય કોઈ તકનીકી ખામી, તે અંગે પોલીસ તપાસ કરી રહી છે. મુસાફરોની સુરક્ષાને ધ્યાનમાં રાખીને સંબધિત વિભાગો દ્વારા હવે હાઈવે પર ડ્રાઈવિંગ પ્રોટોકોલનું ચુસ્ત પાલન કરાવવા માટે કડક સૂચનાઓ આપવામાં આવશે.