નોઈડા : મંગળવારે સાંજે નોઈડા-ગ્રેટર નોઈડા એક્સપ્રેસ વે પર સેક્ટર ૧૫૦ પાસે એક મોટો અકસ્માત સર્જાયો હતો, જેમાં દિલ્હીના લાલ કિલ્લાથી બિહારના મુઝફ્ફરપુર જઈ રહેલી એક ખાનગી સ્લીપર બસમાં અચાનક ભયાનક આગ લાગી ગઈ હતી. આગ લાગતાની સાથે જ બસમાં સવાર આશરે ૩૨ મુસાફરોમાં ભારે અફડાતફડી અને ગભરાટ ફેલાયો હતો. જોકે, ડ્રાઈવર અને બસ સ્ટાફની ત્વરિત સૂઝબૂઝને કારણે તમામ મુસાફરો સમયસર બસમાંથી બહાર નીકળી જવામાં સફળ રહ્યા હતા, જેનાથી એક મોટી હોનારત ટળી હતી અને તમામ લોકોનો આબાદ બચાવ થયો હતો.

પ્રાપ્ત વિગતો અનુસાર, આ ઘટના નોલેજ પાર્ક પોલીસ સ્ટેશન વિસ્તારમાં બની હતી. BSS કૂલ-કૂલ જમુના ટ્રાવેલર્સની બસ (નંબર BR28P3433) મુસાફરોને લઈને પોતાના ગંતવ્ય સ્થાન તરફ જઈ રહી હતી ત્યારે અચાનક ધુમાડો નીકળ્યા બાદ બસમાં આગ ફાટી નીકળી હતી. આગ એટલી ઝડપથી ફેલાઈ હતી કે જોતજોતામાં આખી બસ આગની લપેટમાં આવી ગઈ હતી અને સંપૂર્ણપણે બળીને ખાખ થઈ ગઈ હતી.

મુસાફરો પોતાના જીવ બચાવવા માટે એટલી ઉતાવળમાં બહાર ભાગ્યા હતા કે તેઓ પોતાનો કિંમતી સામાન બસની અંદર જ છોડી દેવા મજબૂર બન્યા હતા. સ્થાનિક લોકો દ્વારા ઘટનાની જાણ કરવામાં આવતા જ નોલેજ પાર્ક પોલીસ સ્ટેશનનો કાફલો અને ફાયર બ્રિગેડની ગાડીઓ તાત્કાલિક ઘટનાસ્થળે દોડી આવી હતી. ફાયર ફાઈટરોએ ભારે જહમત બાદ આગ પર સંપૂર્ણ કાબુ મેળવ્યો હતો.

આ ઘટનાને પગલે નોઈડા એક્સપ્રેસ વે પર થોડા સમય માટે વાહન વ્યવહાર ખોરવાયો હતો અને ટ્રેફિક જામની સ્થિતિ સર્જાઈ હતી. પોલીસે તાત્કાલિક ધોરણે રસ્તા પરથી બસના અવશેષો દૂર કરવાની અને વાહનવ્યવહાર પૂર્વવત કરવાની કામગીરી હાથ ધરી હતી. ઘટના અંગે પોલીસ અધિકારીઓએ જણાવ્યું હતું કે તમામ મુસાફરોને સુરક્ષિત રીતે અન્ય વાહનો મારફતે રવાના કરવાની વ્યવસ્થા કરવામાં આવી છે.

અત્રે ઉલ્લેખનીય છે કે, અગાઉના મહિનામાં પણ દિલ્હીથી મહોબા જતી એક સ્લીપર બસમાં આવી જ રીતે ગંભીર આગ લાગવાની ઘટના બની હતી, જેમાં ૯ મુસાફરોના કરુણ મોત નિપજ્યા હતા અને ૨૦થી વધુ લોકો ઈજાગ્રસ્ત થયા હતા. તે ઘટનામાં ડ્રાઈવર અને કંડક્ટરની બેદરકારી સામે આવતા પોલીસે તેમની ધરપકડ કરી હતી.

હાલમાં નોઈડા પોલીસે વાહન માલિક અને ડ્રાઈવર પાસેથી જરૂરી વિગતો મેળવીને અકસ્માતના સાચા કારણો જાણવા કાનૂની તપાસ શરૂ કરી છે. પ્રાથમિક દ્રષ્ટિએ આગ લાગવાનું કારણ શોર્ટ સર્કિટ હોવાનું માનવામાં આવી રહ્યું છે, પરંતુ પોલીસ અને ફોરેન્સિક ટીમ દ્વારા ટેકનિકલ તપાસ પૂર્ણ થયા બાદ જ આગનું સાચું કારણ સ્પષ્ટ થશે.