ગાઝા, તા.૧૯: મધ્ય પૂર્વના યુદ્ધગ્રસ્ત પ્રદેશ ગાઝામાંથી એક અત્યંત ચિંતાજનક સમાચાર સામે આવ્યા છે. યુનાઇટેડ નેશન્સના વર્લ્ડ ફૂડ પ્રોગ્રામ (WFP) દ્વારા ગાઝામાં ગંભીર ભંડોળની અછતને કારણે માનવતાવાદી સહાયમાં મોટા પાયે કાપ મૂકવાની જાહેરાત કરવામાં આવી છે. આ ઘટાડાના કારણે લગભગ ૫ લાખ જેટલા પેલેસ્ટિનિયનો માસિક ખાદ્ય સહાય વિના વંચિત રહેવા મજબૂર બન્યા છે, જેનાથી આ ક્ષેત્રમાં વ્યાપક ભૂખમરો અને ખાદ્ય કટોકટી વધુ ઘેરી બની છે.

વર્લ્ડ ફૂડ પ્રોગ્રામે માસિક ખાદ્ય સહાય મેળવતા લાભાર્થીઓની સંખ્યા ૧.૬ મિલિયનથી ઘટાડીને સીધી ૧.૧ મિલિયન કરી દીધી છે, જ્યારે ગાઝાની લગભગ બે તૃતીયાંશ વસ્તી પૂરતું ભોજન મેળવવા માટે રોજીંદો સંઘર્ષ કરી રહી છે. આટલું જ નહીં, એજન્સી દ્વારા ૭૫,૦૦૦ પરિવારો માટે ખાદ્ય રાશન અડધું કરી દેવામાં આવ્યું છે તેમજ રોકડ સહાયમાં પણ મોટો ઘટાડો કરાયો છે. રસોઈ બનાવવામાં અસમર્થ લોકોને અપાતા દૈનિક ગરમ ભોજનની સંખ્યા પણ ૨૫૦,૦૦૦ થી ઘટાડીને ૧૫૦,૦૦૦ કરી દેવાઈ છે, અને કેટલાક દૂરના વિસ્તારોમાં તો પરિવારોને હવે દર બે દિવસે માત્ર એક જ વાર ગરમ ભોજન મળી રહ્યું છે.

ડબલ્યુએફપી (WFP) ના કાર્યકારી એક્ઝિક્યુટિવ ડિરેક્ટર કાર્લ સ્કાઉએ ગાઝાની મુલાકાત દરમિયાન જણાવ્યું હતું કે, યુદ્ધવિરામ કરારને એક વર્ષ વીતી જવા છતાં અહીંના રહેવાસીઓનું જીવન અત્યંત કઠિન અને અસુરક્ષિત છે. ગાઝા જ્યારે વધુ એક અત્યંત મુશ્કેલ શિયાળા તરફ આગળ વધી રહ્યો છે, ત્યારે સહાયમાં આ કાપ એવા સમયે આવ્યો છે જ્યારે વસ્તીનો મોટો હિસ્સો સંપૂર્ણપણે માનવતાવાદી રાહત પર નિર્ભર છે. ગાઝાની વસ્તીના બે તૃતીયાંશ એટલે કે આશરે ૧.૪ મિલિયન લોકો ખાદ્ય અસુરક્ષાના ગંભીર કટોકટી સ્તરનો સામનો કરી રહ્યા છે.

ગાઝા અને વેસ્ટ બેંકમાં આગામી છ મહિના સુધી મહત્વપૂર્ણ રાહત અને માનવતાવાદી કામગીરી અવિરત ચાલુ રાખવા માટે વર્લ્ડ ફૂડ પ્રોગ્રામને તાત્કાલિક ૪૫૦ મિલિયન ડોલરના ભંડોળની જરૂર છે. સંસ્થાએ આંતરરાષ્ટ્રીય સમુદાય અને વૈશ્વિક નેતાઓને ગંભીર અપીલ કરી છે કે આ આંખ આડા કાન કરવાનો સમય નથી, પરંતુ પીડિત પરિવારોની વ્હારે આવીને સમર્થનને વધુ મજબૂત કરવાનો અને માનવતાવાદી સંકટને અટકાવવાનો સમય છે.