બેંગલુરુ, તા.૨૮: કર્નાટકની રાજધાની બેંગલુરુ દક્ષિણમાં માનવ અને વન્યજીવ સંઘર્ષની એક કાળજું કંપાવનારી ભયાનક ઘટના સામે આવી છે. સોમવારે વહેલી સવારે મૈસુર રોડ પર આવેલી રાજરાજેશ્વરી મેડિકલ કોલેજથી આશરે બે કિલોમીટર દૂર 'ગુડ અર્થ મલ્હાર એવન્યુ' નજીક જંગલમાંથી ભટકીને આવી ચઢેલા એક વિરાટ હાથીએ ૬૦ વર્ષીય નાગરાજ નામના વૃદ્ધને કચડી નાખતાં તેમનું ઘટનાસ્થળે જ કરૂણ મોત નીપજ્યું હતું. આ ગોઝારી ઘટના બનતાં જ સમગ્ર વિસ્તારમાં ભારે અફડાતફડી અને દહેશતનો માહોલ વ્યાપી ગયો છે.

પ્રાપ્ત માહિતી અનુસાર, મૃતક નાગરાજ વહેલી સવારે આશરે ૫:૦૦ વાગ્યાના સુમારે પોતાની પુત્રી સાથે મોર્નિંગ વોક કરી રહ્યા હતા, ત્યારે બન્નેરઘટ્ટા જંગલમાંથી ભટકીને આવેલો આ મસ્તાન હાથી તેમની સામે આવી ચઢ્યો હતો. પ્રત્યક્ષદર્શીઓ અને CCTV ફૂટેજના આધારે, અચાનક ઉશ્કેરાયેલા હાથીએ કમ્પાઉન્ડ વોલ (સીમાની દીવાલ) તોડી પાડી હતી અને રસ્તા પર ઊભેલા માલવાહક વાહનોમાં ભારે તોડફોડ મચાવી હતી. અચાનક થયેલા આ હુમલામાં ભાગવાનો મોકો ન મળતાં નાગરાજ હાથીની ફેંટમાં આવી ગયા હતા અને તેને કારણે તેમનું મોત થયું હતું.

આ કરૂણ દુર્ઘટના બાદ વન, પરિસ્થિતિકી અને પર્યાવરણ મંત્રી રામલિંગા રેડ્ડીએ હોસ્પિટલની મુલાકાત લઈ મૃતકના પરિવાર પ્રત્યે ઊંડી સંવેદના વ્યક્ત કરી હતી અને રૂ. ૨૦ લાખની તાત્કાલિક આર્થિક સહાયની જાહેરાત કરી હતી. તેમણે જણાવ્યું હતું કે વન વિભાગની ટીમો રાત્રે ૧ વાગ્યા સુધી આ હાથીનો પીછો કરી રહી હતી, પરંતુ તે વસાહતમાં ઘૂસી જશે તેનો અંદાજ નહોતો.

હાલમાં આ આતંક મચાવનાર હાથી BM કાવલ જંગલના વિસ્તારમાં રોકાયેલો છે. તેને સુરક્ષિત રીતે પકડવા અને જંગલમાં પાછો ધકેલવા માટે રામનગર, બન્નેરઘટ્ટા અને બેંગલુરુ અર્બન વિભાગના ૧૦૦થી વધુ વનકર્મીઓની સંયુક્ત ટીમ તૈનાત કરવામાં આવી છે. આ ઉપરાંત, મંગળવાર સવાર સુધીમાં દુબારે હાથી કેમ્પમાંથી ૪ ખાસ તાલીમબદ્ધ 'કુમકી' (Kumki) હાથીઓને બોલાવવામાં આવ્યા છે. વન વિભાગે BM કાવલ જંગલ આસપાસના વિસ્તારોમાં રહેતા લોકોને જ્યાં સુધી ઓપરેશન પૂરું ન થાય ત્યાં સુધી વહેલી સવારે અને મોડી સાંજે બિનજરૂરી બહાર ન નીકળવાની સખત ચેતવણી આપી છે.