મસ્કત:  મધ્ય પૂર્વના અશાંત દરિયાઈ વિસ્તારમાં સ્થિતિ વધુ ગંભીર બની છે. ઓમાનના કિનારા નજીક હોર્મુઝની સમુદ્રધુની પાસે પસાર થઈ રહેલા એક માલવાહક જહાજ પર અચાનક બે વિનાશક ટોર્પિડો વડે હુમલો કરવામાં આવ્યો હતો. આ ભયાનક દુર્ઘટનામાં ભારતના ઉત્તર પ્રદેશ રાજ્યના દેવરિયા જિલ્લાના નિવાસી અને જહાજ પર 'વાઇપર' તરીકે ફરજ બજાવતા ભારતીય નાવિક સૂરજ યાદવનું ઘટનાસ્થળે જ કરુણ મોત નીપજ્યું છે. આ હુમલાથી આંતરરાષ્ટ્રીય જળસીમામાં વેપારી જહાજો અને નિર્દોષ ખલાસીઓની સુરક્ષા સામે ગંભીર પ્રશ્નાર્થચિહ્ન ઊભું થયું છે.

ફોરવર્ડ સીમેન યુનિયન ઓફ ઈન્ડિયા (FSUI) દ્વારા જાહેર કરવામાં આવેલી સત્તાવાર માહિતી અનુસાર, અજાણ્યા સ્થળેથી છોડવામાં આવેલા બે ટોર્પિડોમાંથી એક ટોર્પિડો જહાજની પોર્ટ સાઇડના સી-ડેક પર સીધો અથડાયો હતો, જ્યાં ક્રૂ સભ્યોના ક્વાર્ટર આવેલા હતા. જ્યારે બીજો ટોર્પિડો એન્જિન રૂમ નજીકના જહાજના નીચલા માળખા (હલ) સાથે આક્રમક રીતે અથડાયો હતો. આ કમર્શિયલ જહાજ પર કુલ ૨૮ ક્રૂ સભ્યો સવાર હતા, જેમાં સૌથી વધુ ૨૦ નાવિકો ભારતીય નાગરિકો જ હતા. સૂરજ યાદવના આકસ્મિક અવસાનથી તેમના વતન દેવરિયામાં ભારે શોકનું મોજું ફરી વળ્યું છે.

આ ઘટના બાદ સીમેન યુનિયને આકરા શબ્દોમાં પોતાનો વિરોધ નોંધાવતા જણાવ્યું છે કે, હોર્મુઝ અને આસપાસના વિસ્તારમાં આંતરરાષ્ટ્રીય સુરક્ષાના તમામ દાવા હોકલા સાબિત થઈ રહ્યા છે અને નિરપરાધ નાગરિક ખલાસીઓનો બલિ લેવાઈ રહ્યો છે. યુનિયને માંગ કરી છે કે આ ઘાતકી હુમલા માટે જવાબદાર તત્વો સામે તાત્કાલિક પગલાં લેવામાં આવે, મૃતક સૂરજ યાદવને યોગ્ય ન્યાય મળે અને આ વ્યૂહાત્મક સમુદ્રી માર્ગ પરથી પસાર થતા તમામ ભારતીય ખલાસીઓ માટે સલામત માર્ગ  સુનિશ્ચિત કરવામાં આવે.