હૈદરાબાદ: હૈદરાબાદની શબનમ બેગમ નામની મહિલા સાથે ઓમાનના મસ્કતમાં ઘરેલુ નોકરાણી તરીકે કામ કરવાના નામે ક્રૂર શોષણની ચોંકાવનારી ઘટના સામે આવી છે, જેમાં શબનમને ત્રણ મહિના સુધી વેતન અને પૂરતો ખોરાક આપ્યા વિના ૧૫ કલાક સુધી મજૂરી કરાવવામાં આવી હોવાના ગંભીર આરોપો લાગ્યા છે.

૨૬ માર્ચે રોજગારીની લાલચમાં ઓમાન ગયેલી શબનમ બેગમને દર મહિને ૨૦૦ ઓમાની રિયાલ પગાર આપવાનું વચન આપવામાં આવ્યું હતું, પરંતુ સ્થળ પર પહોંચતા જ તેની સાથે માનસિક અને શારીરિક અત્યાચાર શરૂ થયા હતા. શબનમે એક ભાવનાત્મક વીડિયો દ્વારા જણાવ્યું છે કે તેને લાંબા સમય સુધી મોબાઈલ ફોન પણ આપવામાં આવ્યો ન હતો, જેથી તે પોતાના પરિવારથી સંપૂર્ણ કપાઈ ગઈ હતી.

પીડિત મહિલાએ રાજકારણી અમજદ ઉલ્લાહ ખાનને મોકલેલા વીડિયોમાં જણાવ્યું હતું કે તેને અવારનવાર માર મારવામાં આવતો હતો અને ભૂખ્યું રાખવામાં આવતું હતું, જેનાથી કંટાળીને આખરે તે પોતાના એમ્પ્લોયરના ચુંગાલમાંથી જીવ બચાવીને ભાગી નીકળી હતી. અત્યારે તે મસ્કત સ્થિત ભારતીય દૂતાવાસના આશરે છે.

આ કેસમાં સ્થાનિક ભરતી એજન્ટની ભૂમિકા શંકાના દાયરામાં છે, જેમણે મહિલાને જોખમી પરિસ્થિતિમાં મોકલી હતી. રાજકારણી અમજદ ઉલ્લાહે આ મામલે કડક કાર્યવાહીની માંગ કરતા જણાવ્યું હતું કે શબનમને સલામત રીતે ભારત પરત લાવવી અને તેના શોષણ માટે જવાબદાર એજન્ટ સામે કાયદાકીય પગલાં લેવા અત્યંત જરૂરી છે.

દૂતાવાસે પણ આ સમગ્ર મામલાની ગંભીરતાથી નોંધ લઈને તપાસ શરૂ કરી દીધી છે. શબનમનો પાસપોર્ટ પણ એજન્ટ દ્વારા જપ્ત કરી લેવામાં આવ્યો હોવાથી દૂતાવાસ તેને કાનૂની દસ્તાવેજોની પ્રક્રિયા પૂર્ણ કરી વતન પરત લાવવા માટે સક્રિય પ્રયાસો કરી રહ્યું છે.

આ ઘટનાએ વિદેશમાં કામ માટે જતી મહિલાઓની સુરક્ષા અને સુરક્ષિત રોજગારના મુદ્દાઓને ફરીથી ચર્ચામાં મૂક્યા છે. હવે જોવાનું એ રહેશે કે શબનમ ક્યારે સુરક્ષિત ભારત પાછી ફરે છે અને આવા ભ્રામક વચનો આપીને નિર્દોષ મહિલાઓને ફસાવતા એજન્ટો પર તંત્ર કેવી લગામ કસે છે.