પૂંચ : જમ્મુ-કાશ્મીરના પૂંચ જિલ્લામાં નિયંત્રણ રેખા (LoC) નજીક શનિવારે એક ભયાનક લેન્ડમાઇન વિસ્ફોટની ઘટના સામે આવી છે. સરહદી ગામ બાલાકોટના આગળના વિસ્તારોમાં જ્યારે સેનાની ટીમ રૂટિન પેટ્રોલિંગ પર હતી, ત્યારે અચાનક થયેલા વિસ્ફોટમાં સેનાનો એક જવાન ઘાયલ થયો હતો. આ ધડાકાથી આસપાસના વિસ્તારોમાં ગભરાટ ફેલાઈ ગયો હતો, જોકે સેનાએ તાત્કાલિક મોરચો સંભાળી લીધો હતો.
પેટ્રોલિંગ દરમિયાન અચાનક થયો વિસ્ફોટ
સત્તાવાર માહિતી મુજબ, બાલાકોટ સેક્ટરમાં સરહદની સુરક્ષામાં તૈનાત આર્મીની ટીમ પેટ્રોલિંગ કરી રહી હતી ત્યારે જમીનમાં દટાયેલી એક લેન્ડમાઇન પર પગ આવી જતાં જોરદાર વિસ્ફોટ થયો હતો. આ દુર્ઘટનામાં એક અગ્નિવીર જવાનને ઈજાઓ પહોંચી હતી. ઘાયલ જવાનને તાત્કાલિક લશ્કરી હોસ્પિટલમાં ખસેડવામાં આવ્યો છે, જ્યાં ડોક્ટરોએ તેની હાલત સ્થિર હોવાનું જણાવ્યું છે. સામાન્ય રીતે ઘૂસણખોરોને રોકવા માટે લગાડવામાં આવેલી આ લેન્ડમાઇન્સ ભારે વરસાદને કારણે ક્યારેક જમીનનું ધોવાણ થતાં ઉપર આવી જતી હોય છે, જે આવા અકસ્માતોનું કારણ બને છે.
બીજી તરફ જીવતો મોર્ટાર શેલ મળ્યો
પૂંચના જ બાલનોઈ પ્રદેશમાં આવેલા સાગરા ગામમાં એક અન્ય ઓપરેશન દરમિયાન સેનાને એક કાટ લાગેલો જૂનો મોર્ટાર શેલ મળી આવ્યો હતો. ભરચક વિસ્તારમાં આટલો ઘાતક બોમ્બ મળતા સુરક્ષા દળો સતર્ક થઈ ગયા હતા. સેનાના બોમ્બ ડિસ્પોઝલ સ્ક્વોડે તાત્કાલિક ઘટનાસ્થળે પહોંચીને આ શેલને કોઈ જાનહાનિ ન થાય તે રીતે સુરક્ષિત સ્થળે લઈ જઈને નિયંત્રિત વિસ્ફોટ (Controlled Explosion) દ્વારા નષ્ટ કર્યો હતો.
સુરક્ષા એજન્સીઓ એલર્ટ પર
સીમાવર્તી વિસ્તારોમાં લેન્ડમાઇન વિસ્ફોટ અને મોર્ટાર શેલ મળવાની આ બેવડી ઘટના બાદ સુરક્ષા એજન્સીઓએ સરહદ પર તકેદારી વધારી દીધી છે. સેના દ્વારા આસપાસના વિસ્તારોમાં સર્ચ ઓપરેશન ચલાવવામાં આવી રહ્યું છે જેથી જમીનમાંથી બહાર નીકળી ગયેલી અન્ય કોઈ લેન્ડમાઇન ગ્રામીણો કે જવાનો માટે જોખમ ન બને. પૂંચ અને રાજૌરી સેક્ટરમાં પાકિસ્તાન તરફથી થતી હિલચાલને જોતા ભારતીય સૈનિકો અત્યારે હાઈ એલર્ટ પર છે.