નાંદેડના વજીરાબાદમાં હથિયારોનો મોટો જથ્થો મળતા સમગ્ર મહારાષ્ટ્રમાં ખળભળાટ મચી ગયો છે. પોલીસની સતર્કતાને કારણે એક મોટું નેટવર્ક પકડાયું છે, જે આગામી સમયમાં ગંભીર ઘટનાઓને અંજામ આપી શક્યું હોત... આ ઘટનાએ સુરક્ષા એજન્સીઓની ઊંઘ હરામ કરી દીધી છે.

મહારાષ્ટ્રના નાંદેડ જિલ્લામાં પોલીસ દ્વારા કરવામાં આવેલી એક અત્યંત મહત્વની અને મોટી કાર્યવાહીમાં હથિયારોનો મોટો ભંડાર મળી આવ્યો છે. શહેરના વજીરાબાદ વિસ્તારમાં આવેલા રામદાસ નગરના એક ઘરમાં પોલીસે બાતમીના આધારે દરોડો પાડ્યો હતો. આ કાર્યવાહી દરમિયાન પોલીસ અધિકારીઓ પણ ચોંકી ઉઠ્યા હતા, કારણ કે ત્યાંથી કોઈ એક-બે નહીં પણ હજારોની સંખ્યામાં ઘાતક હથિયારો મળી આવ્યા હતા. નાંદેડ ગ્રામ્ય પોલીસ સ્ટેશનની ટીમે કરેલી આ છાપામારીમાં આશરે 4,000 થી 5,000 જેટલા હથિયારો જપ્ત કરવામાં આવ્યા છે. આ જથ્થામાં મોટી સંખ્યામાં તીક્ષ્ણ તલવારો અને દેશી બનાવટના તમંચાઓનો સમાવેશ થાય છે. જપ્ત કરાયેલા આ તમામ હથિયારોની બજાર કિંમત અંદાજે 43 લાખ 50 હજાર રૂપિયા જેટલી આંકવામાં આવી રહી છે.

આ ગંભીર મામલામાં પોલીસે 50 વર્ષીય આરોપી જસવંત સિંહ પ્રકાશ સિંહ સુખમનીની ધરપકડ કરી છે. પોલીસની પ્રાથમિક તપાસમાં ચોંકાવનારી વિગતો સામે આવી છે કે, આરોપી આટલી મોટી માત્રામાં હથિયારો વેચાણ કરવાના ઈરાદે લાવ્યો હતો. આ હથિયારોને અલગ-અલગ વિસ્તારોમાં સપ્લાય કરવાની પૂરતી તૈયારીઓ કરી લેવામાં આવી હતી. પોલીસ નિરીક્ષક ઓમકાર ચિંચોલકરના નેતૃત્વમાં આ સફળ ઓપરેશન પાર પાડવામાં આવ્યું હતું. 

  આટલા મોટા પાયે હથિયારો પકડાયા બાદ હવે પોલીસ એ દિશામાં તપાસ કરી રહી છે કે આ હથિયારો ક્યાંથી લાવવામાં આવ્યા હતા અને તેનો મુખ્ય માસ્ટર માઇન્ડ કોણ છે. સાથે જ, આ હથિયારો કોને પહોંચાડવાના હતા અને તેનો ઉપયોગ કોઈ મોટી હિંસા કે ગુનાહિત પ્રવૃત્તિ માટે થવાનો હતો કે કેમ, તે અંગે પણ ઊંડાણપૂર્વક તપાસ શરૂ કરવામાં આવી છે. અવિનાશ કુમારે પોલીસ ટીમની આ કામગીરીની પ્રશંસા કરતા જણાવ્યું હતું કે ગેરકાયદેસર હથિયારોના વેપાર સામેનું અભિયાન હજુ વધુ તેજ કરવામાં આવશે. કાયદો અને વ્યવસ્થા જાળવી રાખવા માટે આવા ગુનેગારો સામે કડક પગલાં લેવામાં આવશે.