મુંબઈ: વૈશ્વિક ટેકનોલોજી જાયન્ટ 'એમેઝોન' (Amazon) ના ચીફ એક્ઝિક્યુટિવ ઓફિસર (CEO) એન્ડી જેસીએ આર્ટિફિશિયલ ઇન્ટેલિજન્સ (AI) ના ભવિષ્ય અને માર્કેટ ટ્રેન્ડ અંગે અત્યંત મહત્વનું નિવેદન આપ્યું છે. સીએનબીસી-ટીવી૧૮ (CNBC-TV18) ને આપેલા એક ખાસ ઇન્ટરવ્યુમાં જેસીએ સ્વીકાર્યું છે કે કંપની હાલમાં જે સ્તરે સેવાઓ પૂરી પાડી શકે છે તેના કરતાં માર્કેટમાં એઆઈ (AI) સેવાઓની માંગ ઘણી વધારે છે. ડેટા સેન્ટરો અને હાઇટેક ઇન્ફ્રાસ્ટ્રક્ચર પાછળ અબજો ડોલરના આંધણ કરવા છતાં એમેઝોન ગ્રાહકોની આ આસમાને પહોંચેલી જરૂરિયાતોને પૂરી કરવા માટે સંઘર્ષ કરી રહ્યું છે.
શરૂઆતનો ખર્ચ વધારે, પણ લાંબા ગાળે બમ્પર કમાણી
એન્ડી જેસીએ જણાવ્યું હતું કે એમેઝોન વેબ સર્વિસીસ (AWS) ખૂબ જ ઝડપથી પોતાની ક્લાઉડ અને કમ્પ્યુટિંગ ક્ષમતા વધારી રહ્યું છે, પરંતુ બજારમાં તેની એટલી મજબૂત પકડ છે કે ક્ષમતા ઉમેરાતાની સાથે જ તેનું મુદ્રીકરણ (મોનેટાઇઝેશન) થઈ જાય છે. હાલમાં રોકાણકારો AI ઇન્ફ્રાસ્ટ્રક્ચર પાછળ ટેક કંપનીઓ દ્વારા કરવામાં આવતા પ્રચંડ મૂડી ખર્ચ (Capex) અને ફ્રી કેશ ફ્લો (મુક્ત રોકડ પ્રવાહ) પર પડી રહેલા દબાણ અંગે ચિંતિત છે. આ ચિંતાઓને ફગાવતા જેસીએ આજના પ્રવાહની સરખામણી ક્લાઉડ કમ્પ્યુટિંગના શરૂઆતના વર્ષો સાથે કરી હતી. તેમણે આશ્વાસન આપ્યું હતું કે આ ખર્ચ કાયમી નથી પરંતુ કામચલાઉ છે અને માંગ સપ્લાય સાથે મચાવ્યા બાદ રોકડ પ્રવાહ આપોઆપ સામાન્ય થઈ જશે.
એમેઝોનનો માસ્ટર પ્લાન: AI ને સસ્તું બનાવવું જરૂરી
•    કસ્ટમ ચિપ્સમાં રોકાણ: એમેઝોન હવે પોતાની કસ્ટમ AI ચિપ્સ વિકસાવવા માટે મોટા પાયે રોકાણ કરી રહ્યું છે, જેથી ઇન્ફરન્સ કોસ્ટ (તાલીમ લીધા પછી મોડેલ ચલાવવાનો ખર્ચ) ઘટાડી શકાય.
•    વ્યાપક સ્વીકારની શરત: એન્ડી જેસીના મતે, ગ્રાહકોને આકર્ષક વળતર ત્યારે જ મળશે જો AI નો ઉપયોગ કરવાનો દૈનિક ખર્ચ ઘટશે. ખર્ચમાં ઘટાડો એ જ આ ટેકનોલોજીના ગ્લોબલ સક્સેસની એકમાત્ર ચાવી છે.
•    AWS ની ધમાકેદાર વૃદ્ધિ: હાલમાં એમેઝોનનો ક્લાઉડ ડિવિઝન (AWS) વાર્ષિક ધોરણે ૨૮% ના શાનદાર દરે આગળ વધી રહ્યો છે અને તેનો રેવન્યુ રન રેટ આશરે $૧૫૦ બિલિયન (અંદાજે ₹૧૨.૫ લાખ કરોડથી વધુ) પર પહોંચી ગયો છે.
ભારતમાં આવશે મોટા પ્રોજેક્ટ્સ
આ રેસમાં એમેઝોન ઉપરાંત માઇક્રોસોફ્ટ, આલ્ફાબેટ (ગુગલ) અને મેટા પ્લેટફોર્મ્સ જેવી દિગ્ગજ કંપનીઓ પણ અબજો ડોલરનું રોકાણ કરી રહી છે. ખાસ વાત એ છે કે, એમેઝોનના સીઈઓએ ભારતીય બજાર માટે પણ મોટી જાહેરાત કરી છે. એમેઝોન ભારતમાં વધારાના $૧૩ બિલિયન (આશરે ₹૧.૧ લાખ કરોડ) નું મોટું રોકાણ કરવા જઈ રહ્યું છે, જે સંપૂર્ણપણે AWS ક્લાઉડ ઇન્ફ્રાસ્ટ્રક્ચર અને AI પ્રોજેક્ટ્સના વિસ્તરણ માટે વાપરવામાં આવશે. આ રોકાણ ભારતના ડિજિટલ અને આઇટી સેક્ટરને એક નવી ઊંચાઈ પર લઈ જશે તેમ માનવામાં આવી રહ્યું છે.