પટના, : બિહારમાં યોજાયેલા 'બિહાર બંધ' દરમિયાન કાયદો અને વ્યવસ્થાની સ્થિતિ વણસતા જનશક્તિ જનતા દળના વડા અને ભૂતપૂર્વ મંત્રી તેજ પ્રતાપ યાદવ સહિત ૨૦૮ જેટલા પ્રદર્શનકારીઓની પોલીસ દ્વારા ધરપકડ કરવામાં આવી છે, જ્યારે ૨,૨૦૦થી વધુ અજાણ્યા તથા નામાંકિત વ્યક્તિઓ સામે ગુનો નોંધવામાં આવ્યો છે.

શનિવારે રામગુલામ ચોક ખાતે વિદ્યાર્થીઓના સમર્થનમાં ઉતરેલા તેજ પ્રતાપ યાદવે કેન્દ્રીય શિક્ષણ પ્રધાનના રાજીનામાની માંગ સાથે ઉગ્ર વિરોધ પ્રદર્શન શરૂ કર્યું હતું, જેના પગલે શરૂઆતમાં સાવચેતીના ભાગરૂપે તેમની અટકાયત કરવામાં આવી હતી.

પોલીસ કસ્ટડીમાંથી મુક્ત થયા બાદ તેજ પ્રતાપ સાંજે ફ્રેઝર રોડ પર આવેલા સિટી સેન્ટર મોલ પહોંચ્યા હતા, જ્યાંથી વિશેષ પોલીસ ટીમે કાયદો અને વ્યવસ્થા ભંગ કરવાના આરોપસર તેમની પુનઃ ધરપકડ કરીને નૌબતપુર પોલીસ સ્ટેશન ખસેડ્યા હતા.

આ ઉગ્ર વિરોધ પ્રદર્શન દરમિયાન થયેલી હિંસા અને પથ્થરમારામાં બાકરગંજ સ્ટેશન હાઉસ ઓફિસર સહિત ૧૨ પોલીસકર્મીઓ ગંભીર રીતે ઘાયલ થયા હતા, જ્યારે સામે પક્ષે પોલીસના લાઠીચાર્જમાં ૨૦થી વધુ પ્રદર્શનકારીઓ પણ ઈજાગ્રસ્ત થયા છે.

ઘટનાની ગંભીરતાને ધ્યાનમાં રાખીને ગાંધી મેદાન અને કોતવાલી પોલીસ સ્ટેશનમાં ચાર અલગ-અલગ કેસ દાખલ કરવામાં આવ્યા છે, જેમાં ધારાસભ્ય ગૌતમ કૃષ્ણ સહિતના અટકાયત કરાયેલા નેતાઓ સામે કાનૂની કાર્યવાહી શરૂ કરવામાં આવી છે.

આ સમગ્ર ઘટના બાદ પ્રશાસન દ્વારા રાજ્યમાં સુરક્ષા વ્યવસ્થા વધુ સઘન બનાવવામાં આવી છે અને આગામી સમયમાં કાયદો તોડનારાઓ સામે વધુ કડક પગલાં લેવાની ચીમકી ઉચ્ચારવામાં આવી છે