દિલ્હી : રાષ્ટ્રીય રાજધાનીના કનોટ પ્લેસ વિસ્તારમાં વડાપ્રધાન નરેન્દ્ર મોદીના સમર્થક એવા કાશ્મીરી યુવક ફહીમ નઝીર પર થયેલા કથિત હુમલાના વિરોધમાં રાજકીય ગરમાવો વ્યાપી ગયો છે. આ ઘટનાના અનુસંધાને મુસ્લિમ રાષ્ટ્રીય મંચના ગૌ સેવા સેલના રાષ્ટ્રીય સંયોજક અને સામાજિક કાર્યકર મોહમ્મદ ફૈઝ હાથમાં એક અનોખું પોસ્ટર લઈને દિલ્હીના માર્ગો પર વિરોધ પ્રદર્શન કરતા નજરે પડ્યા હતા. પોસ્ટરમાં લખવામાં આવ્યું હતું કે, "હું મુસ્લિમ છું, મોદીજીનો ચાહક છું, અને હું મારા પર હુમલો કરનારા કોંગ્રેસના ગુંડાઓથી ડરતો નથી." આ અનોખા પ્રદર્શનનો વીડિયો ડિજિટલ પ્લેટફોર્મ પર ભારે વાયરલ થઈ રહ્યો છે.
બનાવની વિગતો મુજબ, કનોટ પ્લેસ ખાતે કોંગ્રેસના વિરોધ પ્રદર્શન દરમિયાન શ્રીનગરના નિવાસી ફહીમ નઝીરે દેશ અને વડાપ્રધાન નરેન્દ્ર મોદીના સમર્થનમાં પોતાના વિચારો રજૂ કરીને સૂત્રોચ્ચાર કર્યા હતા. ફહીમે આરોપ લગાવ્યો હતો કે પોતાને મોદી સમર્થક ગણાવતા જ ત્યાં હાજર વિરોધકર્તાઓએ તેના પર જીવલેણ હુમલો કર્યો હતો અને તેને રસ્તા પર ઢસડ્યો હતો. આ ઘટના અંગે પ્રતિક્રિયા આપતાં મોહમ્મદ ફૈઝે સોશિયલ મીડિયા પર જણાવ્યું કે, "અમે સદીઓથી કોંગ્રેસને મત આપ્યો પરંતુ તેમણે મુસ્લિમો માટે કંઈ ન કર્યું. આજે જ્યારે એક કાશ્મીરી મુસ્લિમ ભાઈ મોદીજીનો ચાહક બન્યો ત્યારે તેના પર હુમલો કરવામાં આવ્યો. લોકશાહીમાં દરેકને પોતાની મરજી મુજબના નેતાને સમર્થન આપવાનો અધિકાર છે."
મૂળ છત્તીસગઢના રાયપુરના રહેવાસી અને અગાઉ સરકારી કોલેજમાં રાજકીય વિજ્ઞાનના લેક્ચરર રહી ચૂકેલા મોહમ્મદ ફૈઝે રોષ વ્યક્ત કરતાં ઉમેર્યું હતું કે, "જો મોદીજીના ચાહક બનવાથી હુમલા થતા હોય તો મને પણ માર મારો, હું પણ મુસ્લિમ છું અને મોદીજીનો ચાહક છું." ફૈઝે આક્ષેપ કર્યો હતો કે વિરોધ પક્ષો મુસ્લિમોને માત્ર વોટબેંક તરીકે ઉપયોગ કરવા માંગે છે અને તેમના આ વૈચારિક પરિવર્તનને સહન કરી શકતા નથી. રસ્તાઓ પર વિરોધ દર્શાવતાં ફૈઝની આ વાયરલ ક્લિપ હાલ વિવિધ સોશિયલ મીડિયા પ્લેટફોર્મ પર ચર્ચાના કેન્દ્રમાં છે.