મુંબઈ: શિવસેના (UBT)ના પ્રમુખ ઉદ્ધવ ઠાકરેએ પક્ષના આંતરિક વિખવાદ અને રાજકીય કટોકટી વચ્ચે એક મોટો દાવ ખેલ્યો છે. કાર્યકરોની બેઠકમાં ભાવુક અને આક્રમક અંદાજમાં તેમણે જાહેરાત કરી કે જો પક્ષના નેતાઓ કે સામાન્ય કાર્યકરોને પણ એવું લાગતું હોય કે તેઓ આ સર્વોચ્ચ પદ માટે અયોગ્ય છે, તો તેઓ ક્ષણનો પણ વિલંબ કર્યા વિના રાજીનામું આપવા તૈયાર છે. જો કે, તેમણે સ્પષ્ટ કર્યું કે આ કોઈ શરણાગતિ નથી પણ સંઘર્ષની નવી શરૂઆત છે, અને તેઓ પક્ષના સ્થાપક બાળાસાહેબ ઠાકરેના આદેશ મુજબ દગો કરનારાઓ સામે રાજકીય લડાઈ ચાલુ જ રાખશે.

ભૂતપૂર્વ મુખ્યમંત્રીએ ભારતીય જનતા પાર્ટી પર આકરા પ્રહારો કરતા દાવો કર્યો હતો કે શિવસેનાના ત્રણ દાયકાના સાથ વગર ભાજપ ક્યારનોય ખતમ થઈ ગયો હોત. આજે મહારાષ્ટ્રમાં ભાજપ પોતે જ શિંદે જૂથના ઓપરેશનથી પરેશાન થઈ ચુક્યું છે. ચૂંટણી પરિણામો જ પક્ષની અસલી તાકાત નક્કી કરશે તેમ જણાવતા તેમણે ઉમેર્યું કે, સત્તા જવાના ડરથી તેઓ ક્યારેય સિદ્ધાંતો સાથે સમાધાન નહીં કરે.

કોંગ્રેસ સાથેના જોડાણ અંગે ઉઠતા સવાલોનો વળતો જવાબ આપતા ઠાકરેએ જણાવ્યું કે, જો શિવસેના ૩૦ વર્ષ ભાજપ સાથે રહીને પણ પોતાના અસ્તિત્વને બચાવી શકી હોય, તો કોંગ્રેસમાં ભળી જવાનો કોઈ પ્રશ્ન જ ઊભો થતો નથી. ભૂતકાળમાં વૈચારિક મતભેદો હોવા છતાં કોંગ્રેસે ક્યારેય ઠાકરે પરિવારના નિવાસસ્થાન 'માતોશ્રી'ની ગરિમાનું અપમાન કર્યું નથી. આ લડાઈ હવે પદની નથી પણ સ્વાભિમાનની છે તેવો મજબૂત સંદેશ તેમણે કાર્યકરોને આપ્યો છે.