બેંગલુરુ: કર્ણાટકના પૂર્વ મુખ્યમંત્રી અને કોંગ્રેસના વરિષ્ઠ નેતા સિદ્ધારમૈયાએ રવિવારે જાહેરાત કરી છે કે તેઓ વર્ષ ૨૦૨૮ની કર્ણાટક વિધાનસભા ચૂંટણી નહીં લડે. ૭૯ વર્ષીય નેતાએ વધતી ઉંમર, કથળતા સ્વાસ્થ્ય અને વર્તમાન સમયમાં રાજકારણમાં વધી રહેલા ભ્રષ્ટાચારને પોતાના આ નિર્ણય પાછળના મુખ્ય કારણો ગણાવ્યા છે. જોકે, તેમણે સ્પષ્ટ કર્યું છે કે તેઓ ચૂંટણી નહિ લડે પરંતુ જાહેર જીવનમાં સક્રિય રહીને જનતાના અવાજ તરીકે કાર્ય ચાલુ રાખશે.

 ૫૦ વર્ષની રાજકીય સફર અને ઉંમરનું કારણ:

સોશિયલ મીડિયા પ્લેટફોર્મ એક્સ (X) પર એક પોસ્ટ શેર કરતા સિદ્ધારમૈયાએ જણાવ્યું હતું કે, "હું હાલ ૭૯ વર્ષનો છું અને આપણી સરકારની મુદતમાં હજુ દોઢ વર્ષ બાકી છે. જ્યારે ૨૦૨૮ની ચૂંટણી આવશે ત્યારે મારી ઉંમર ૮૧ થી ૮૨ વર્ષ જેટલી હશે. મારું સ્વાસ્થ્ય હવે પહેલા જેવું મજબૂત નથી રહ્યું અને અગાઉના ઉત્સાહથી કામ કરવું હવે શક્ય નથી." તેમણે વધુમાં ઉમેર્યું હતું કે વર્ષ ૨૦૨૮માં તેમની રાજકીય કારકિર્દીના ૫૦ વર્ષ પૂર્ણ થશે, કારણ કે તેમણે ૧૯૭૮માં તાલુકા બોર્ડના સભ્ય તરીકે જાહેર જીવનમાં પ્રવેશ કર્યો હતો.

 "આજના સમયમાં ચૂંટણી લડવા માટે લોકોને પૈસા આપવા પડે છે":

ચૂંટણી રાજકારણની બદલાતી સ્થિતિ પર દુઃખ વ્યક્ત કરતાં તેમણે લખ્યું હતું કે, "આજે રાજકીય ક્ષેત્ર સંપૂર્ણપણે ભ્રષ્ટ થઈ ગયું છે. એવો સમય આવી ગયો છે કે જો આપણે ચૂંટણી લડવી હોય તો લોકોને પૈસા આપવા પડે છે. ભ્રષ્ટ બનેલી આ સિસ્ટમમાં પ્રમાણિક રાજનીતિ માટે હવે કોઈ સ્થાન બચ્યું નથી. આ પૃષ્ઠભૂમિમાં મેં ભવિષ્યની ચૂંટણીઓ ન લડવાનો નિર્ણય લીધો છે." પોતાના વરુણા મતવિસ્તારના લોકો ફરી ચૂંટણી લડવા આગ્રહ કરી રહ્યા હોવા છતાં તેમણે હવે પછી કોઈ ચૂંટણી ન લડવાનો મક્કમ નિર્ધાર કર્યો છે.

 જાહેર સેવામાં સક્રિય રહેવાનો સંકલ્પ:

પોતાની પાંચ દાયકાની કારકિર્દીનો ઉલ્લેખ કરતાં સિદ્ધારમૈયાએ જણાવ્યું કે તેમણે અનેક જીત અને હાર જોઈ છે, પરંતુ તેમણે ક્યારેય પોતાના સિદ્ધાંતો કે વિવેકબુદ્ધિ સાથે સમજૂતી કરી નથી. પાંચ દાયકા સુધી રાજ્યની જનતાએ જે પ્રેમ અને સ્નેહ આપ્યો છે તેનો ઋણ સ્વીકારતા તેમણે જણાવ્યું હતું કે તેઓ ચૂંટણી પદ પર નહીં રહેવા છતાં ભવિષ્યનું જીવન પણ જનતાની સેવામાં જ સમર્પિત રાખશે.