નવી દિલ્હી : આંતરરાષ્ટ્રીય ક્રિકેટ કાઉન્સિલ (ICC) દ્વારા આગામી વર્ષોમાં યોજાનારી વૈશ્વિક ક્રિકેટ સ્પર્ધાઓનું નવું કેલેન્ડર સત્તાવાર રીતે જાહેર કરવામાં આવ્યું છે, જેના કારણે ક્રિકેટ જગતમાં ભારે ઉત્સાહ જોવા મળી રહ્યો છે. તાજેતરમાં દુબઈ ખાતે મળેલી બેઠકો અને સભ્ય બોર્ડ્સ સાથેની ચર્ચા બાદ ICCએ ૨૦૨૭ થી ૨૦૩૧ વચ્ચે યોજાનાર મહત્ત્વપૂર્ણ ટૂર્નામેન્ટોની તારીખો જાહેર કરી છે. આ નવા શેડ્યૂલ મુજબ, લોસ એન્જલસ ઓલિમ્પિક્સ ૨૦૨૮ (LA Olympics 2028) માટેના પુરુષ અને મહિલા ક્રિકેટ ક્વોલિફાયર મુકાબલા જાન્યુઆરી અને ફેબ્રુઆરી ૨૦૨૮ દરમિયાન યોજાશે. આ ઉપરાંત, ટેસ્ટ ક્રિકેટની સર્વોચ્ચ ટ્રોફી ગણાતી ૨૦૨૯ની વર્લ્ડ ટેસ્ટ ચેમ્પિયનશિપ (WTC) ની ફાઇનલ મેચ ૮ થી ૧૨ જૂન દરમિયાન ઈંગ્લેન્ડની ધરતી પર રમાશે.

ઓલિમ્પિક ક્વોલિફાયર અગાઉ ૨૦૨૭માં યોજાવાના હતા, પરંતુ હવે તેને ઓલિમ્પિક્સના પ્રારંભના છ મહિના કરતા પણ ઓછા સમય પહેલા એટલે કે ૨૦૨૮ની શરૂઆતમાં ખસેડવામાં આવ્યા છે. ઉલ્લેખનીય છે કે ૧૨૪ વર્ષના લાંબા અંતરાલ બાદ ૧૯૦૪ પછી પ્રથમ વખત ક્રિકેટની રમત ઓલિમ્પિક મહાકુંભમાં પરતી રહી છે, જેને લઈને ખેલાડીઓ અને પ્રશંસકોમાં ભારે આતુરતા છે. છ ટીમોની પુરુષ અને મહિલા ઓલિમ્પિક સ્પર્ધાઓ માટે ક્વોલિફિકેશન માળખું અગાઉ જ નક્કી કરી લેવાયું હતું, જેમાં મહિલા વર્ગમાં ઓસ્ટ્રેલિયા, ભારત, દક્ષિણ આફ્રિકા અને ગ્રેટ બ્રિટને પોતપોતાના ખંડોમાંથી સર્વોચ્ચ ક્રમાંક મેળવીને સ્થાન નિશ્ચિત કરી લીધું છે. જ્યારે પુરુષ વર્ગ માટે ૩૧ ડિસેમ્બર, ૨૦૨૬ સુધીના ICC T20I રેન્કિંગના આધારે ટોચની ટીમો સીધી પાત્રતા મેળવશે.

આ સાથે જ યજમાન દેશ યુનાઇટેડ સ્ટેટ્સ (USA) ના ક્વોલિફિકેશનને લઈને પણ કેટલાક મહત્ત્વપૂર્ણ સુધારા કરવામાં આવ્યા છે. પુરુષ ટીમ ૧૩મા ક્રમે હોવાથી ટોચની ૧૫ ટીમોમાં સ્થાન મેળવીને સીધી પાત્રતા મેળવી શકે તેમ છે, પરંતુ ૧૯મા ક્રમે રહેલી યુએસ મહિલા ટીમ માટે સીધો પ્રવેશ મેળવવો જોખમમાં હોવાથી ICCએ તેના માપદંડોમાં સુધારો કરીને ફેબ્રુઆરી ૨૦૨૭માં ભારતમાં યોજાનારી 'વુમન્સ ચેમ્પિયન્સ ટ્રોફી' સાથે તેને સાંકળી લીધી છે. દરેક ઓલિમ્પિક ક્વોલિફાયર ટુર્નામેન્ટમાં આઠ ટીમો ભાગ લેશે. આ ઉપરાંત, ICC કેલેન્ડર મુજબ ૨૦૨૮માં સપ્ટેમ્બરથી નવેમ્બર દરમિયાન મહિલા અને પુરુષ T20 વર્લ્ડ કપ એક પછી એક યોજાશે, જેમાં પાકિસ્તાન મહિલા T20 વર્લ્ડ કપની અને ઓસ્ટ્રેલિયા-ન્યુઝીલેન્ડ પુરુષ T20 વર્લ્ડ કપની યજમાની કરશે.