નવી દિલ્હી: આઠમા પગાર પંચ સમક્ષ મોંઘવારી ભથ્થું મૂળ પગારમાં ભેળવવાની માંગ રજૂ થઈ છે, પરંતુ સરકારે તેનો સ્વીકાર કે ૨.૧નો ફિટમેન્ટ ગુણક નક્કી કર્યો નથી.

ઉદાહરણાત્મક ગણતરીમાં લેવલ-૬ના કર્મચારીના વર્તમાન મૂળ પગાર, સંભવિત મોંઘવારી ભથ્થાના વિલીનીકરણ, ૨.૧ના ગુણક અને દર વર્ષે સાત ટકા વધારાને આધારે વર્ષ ૨૦૩૩ સુધી પગાર બમણો થઈ શકે તેવું દર્શાવાયું છે. પરંતુ આ આંકડા આઠમા પગાર પંચની ભલામણ નથી. કર્મચારી અને પેન્શનર સંગઠનો જુદા જુદા ફિટમેન્ટ ગુણક, મોંઘવારી ભથ્થાનું વિલીનીકરણ અને વાર્ષિક વધારાની માગ કરી રહ્યાં છે. કેટલાક સંગઠનોએ તો ૩.૮૩૩નો ગુણક અને રૂ. ૬૯ હજાર લઘુતમ મૂળ પગારની માગ મૂકી છે. અગાઉ કેન્દ્ર સરકારે મોંઘવારી ભથ્થું મૂળ પગારમાં જોડવાની કોઈ દરખાસ્ત વિચારણા હેઠળ નહીં હોવાનું જણાવ્યું હતું. તેથી સંભવિત પગારવધારાની ગણતરીને અધિકૃત નિર્ણય કે ખાતરીપૂર્વક મળનારી રકમ તરીકે રજૂ કરવી ભ્રામક બનશે.