મુંબઈ : દક્ષિણ મુંબઈના ઐતિહાસિક આઝાદ મેદાન ખાતે આઇઆઇટી બોમ્બે (IIT Bombay) ના દિવંગત વિદ્યાર્થી સાહિલ વાકોડેના ન્યાય માટે ચાલી રહેલી ભૂખ હડતાળનો આજે બીજો દિવસ છે. યવતમાળના રહેવાસી સાહિલના પિતા રવીન્દ્ર વાકોડે અને માતા સોનાલી વાકોડે પોતાના વ્હાલસોયા પુત્રના મોત માટે જવાબદાર વ્યકિતઓ સામે સખત કાનૂની કાર્યવાહી અને ધરપકડની માંગ સાથે કામચલાઉ મંચ પર બેઠાં છે. આ મામલે તેમના વકીલે જણાવ્યું છે કે આટલી ગંભીર પરિસ્થિતિ હોવા છતાં હજી સુધી સરકારના કોઈ પ્રતિનિધિ કે પ્રશાસન તરફથી તેમનો સંપર્ક સાધવામાં આવ્યો નથી.

જાતિગત સતામણી અને પરીક્ષાના વિવાદ બાદ વિદ્યાર્થીએ ભર્યું હતું અંતિમ પગલું

ઉલ્લેખનીય છે કે ઇન્ડિયન ઇન્સ્ટિટ્યૂટ ઑફ ટેક્નોલોજી (IIT) બોમ્બેમાં બીજા વર્ષનો બી.ટેકનો વિદ્યાર્થી સાહિલ વાકોડે ગત ૧૮ સપ્ટેમ્બરના રોજ તેની હોસ્ટેલની રૂમમાં મૃત હાલતમાં મળી આવ્યો હતો. પરીક્ષા દરમિયાન મોબાઈલના ઉપયોગ સંબંધિત વિવાદ બાદ તેણે આ અંતિમ પગલું ભર્યું હતું. જોકે, સાહિલનાં માતા-પિતાએ ગંભીર આક્ષેપ કર્યો છે કે તેમના પુત્રને સતત જાતિગત ભેદભાવ અને સતામણીનો શિકાર બનાવવામાં આવતો હતો, જેના કારણે તેણે આત્મહત્યા કરવા મજબૂર થવું પડ્યું હતું.

આઇઆઇટી ડાયરેક્ટર અને પ્રોફેસરની ધરપકડની માંગ પર અડગ પરિવાર

આ પ્રકરણે આત્મહત્યા માટે દુષ્પ્રેરણા આપવાનો ગુનો નોંધાયા બાદ, સાહિલના પરિવારે આઇઆઇટી બોમ્બેના ડિરેક્ટર શિરીષ કેદારે તેમજ પ્રોફેસર સૂર્યનારાયણ દુલ્લાની ત્વરિત ધરપકડ કરવાની માંગ કરી છે. વિરોધ પ્રદર્શન અને વિદ્યાર્થીઓના રોષ બાદ અગાઉ પ્રોફેસર સૂર્યનારાયણ દુલ્લાને વહીવટી બાબતોના ડીન પદેથી હટાવવામાં આવ્યા હતા, પરંતુ પરિવારનો આક્ષેપ છે કે જ્યાં સુધી ન્યાય નહીં મળે ત્યાં સુધી આ લડાઈ ચાલુ રહેશે. પિતા રવીન્દ્ર વાકોડે પોલીસ માર્ગદર્શિકા મુજબ પોતાની હડતાળ ચાલુ રાખી રહ્યા છે, ત્યારે આ સંવેદનશીલ મુદ્દે રાજકીય અને શૈક્ષણિક બેડામાં પણ ભારે ચર્ચાઓ ચાલી રહી છે.