નવી દિલ્હી: કેન્દ્રીય શ્રમ અને રોજગાર તેમજ યુવા બાબતો અને રમતગમત મંત્રી ડૉ. મનસુખ માંડવિયાના અધ્યક્ષસ્થાને નવી દિલ્હીમાં કર્મચારી રાજ્ય વીમા નિગમ (ઈએસઆઈસી)ની ૧૯૮મી બેઠક યોજાઈ હતી. બેઠકમાં વીમાધારક કર્મચારીઓ અને તેમના પરિવારજનોને વધુ ગુણવત્તાસભર આરોગ્ય સેવાઓ ઉપલબ્ધ કરાવવા, ઈએસઆઈસીના આરોગ્ય માળખાને મજબૂત બનાવવા તથા તબીબી શિક્ષણના વિસ્તરણ સહિત અનેક મહત્વપૂર્ણ નીતિગત નિર્ણયો લેવામાં આવ્યા હતા.

બેઠકમાં ડૉ. મનસુખભાઈ માંડવિયાએ જણાવ્યું હતું કે કેન્દ્ર સરકાર શ્રમિકોના કલ્યાણ માટે સંપૂર્ણપણે પ્રતિબદ્ધ છે અને ઈએસઆઈસીને વધુ આધુનિક, કાર્યક્ષમ અને લોકો સુધી સરળતાથી પહોંચે તેવી સંસ્થા બનાવવાના પ્રયાસો સતત ચાલુ છે. તેમણે ભારપૂર્વક જણાવ્યું કે બેઠકમાં મંજૂર કરાયેલા નિર્ણયો લાખો વીમાધારક કર્મચારીઓ અને તેમના પરિવારજનોને વધુ સારી અને સુલભ આરોગ્ય સેવાઓ પૂરી પાડવામાં મહત્વની ભૂમિકા ભજવશે.

બેઠકમાં દેશભરમાં ઈએસઆઈસીની હોસ્પિટલો, ડિસ્પેન્સરીઓ અને અન્ય આરોગ્ય સંસ્થાઓના ઈન્ફ્રાસ્ટ્રક્ચરને વધુ મજબૂત બનાવવા, આધુનિક તબીબી સાધનો ઉપલબ્ધ કરાવવા તથા જરૂરિયાત મુજબ નવી આરોગ્ય સુવિધાઓ વિકસાવવા માટેના પ્રસ્તાવોને મંજૂરી આપવામાં આવી હતી.

આ ઉપરાંત ઈએસઆઈસી સંચાલિત મેડિકલ કોલેજોમાં તબીબી શિક્ષણનો વ્યાપ વધારવા, એમબીબીએસ અને અનુસ્નાતક અભ્યાસક્રમોની બેઠકોમાં વધારો કરવા તેમજ શિક્ષણની ગુણવત્તામાં સુધારો લાવવાના આયોજનને પણ મંજૂરી આપવામાં આવી હતી. આ પગલાંથી દેશમાં તબીબી ક્ષેત્રે માનવ સંસાધનની ઉપલબ્ધિમાં વધારો થવાની અપેક્ષા વ્યક્ત કરવામાં આવી છે.

બેઠકમાં ઈએસઆઈસીની કામગીરીને વધુ પારદર્શક, ઝડપી અને ટેક્નોલોજી આધારિત બનાવવા માટે વિવિધ વહીવટી સુધારાઓને પણ મંજૂરી આપવામાં આવી હતી. સેવા વિતરણ પ્રક્રિયાને વધુ સરળ, અસરકારક અને ડિજિટલ બનાવવા પર ખાસ ભાર મૂકવામાં આવ્યો હતો.

બેઠકમાં ઉપસ્થિત વરિષ્ઠ અધિકારીઓએ મંજૂર કરાયેલા વિવિધ પ્રોજેક્ટો અને યોજનાઓના ઝડપી અમલીકરણ માટે સમયબદ્ધ કાર્યવાહી હાથ ધરવા અંગે પણ ચર્ચા કરી હતી. કેન્દ્ર સરકારનું માનવું છે કે આ નિર્ણયો અમલમાં આવ્યા બાદ દેશભરના લાખો ઈએસઆઈસી વીમાધારક કર્મચારીઓ અને તેમના પરિવારજનોને વધુ ગુણવત્તાસભર આરોગ્ય સેવાઓ તેમજ તબીબી શિક્ષણ ક્ષેત્રે નવી તકો ઉપલબ્ધ થશે.