યુએસ સ્ટેટ ડિપાર્ટમેન્ટે જાહેરાત કરી છે કે ઈઝરાયેલ અને લેબેનોન વચ્ચે સરહદી વિવાદ ઉકેલવા અને શાંતિ માટે આવતા સપ્તાહે વોશિંગ્ટનમાં બે દિવસીય મંત્રણા થશે.

મધ્ય પૂર્વમાં શાંતિ પુનઃસ્થાપિત કરવાના પ્રયાસરૂપે અમેરિકાની મધ્યસ્થીથી એક મોટું પગલું લેવામાં આવી રહ્યું છે. યુએસ સ્ટેટ ડિપાર્ટમેન્ટના પ્રવક્તા થોમસ પિગોટ દ્વારા બહાર પાડવામાં આવેલા સત્તાવાર નિવેદન મુજબ, આગામી સપ્તાહે ૧૪ અને ૧૫ મેના રોજ અમેરિકાના પાટનગર વોશિંગ્ટનમાં ઈઝરાયેલ અને લેબેનોનના વાટાઘાટકારો વચ્ચે બે દિવસીય સઘન મંત્રણા યોજાશે. આ બેઠકનો મુખ્ય ઉદ્દેશ્ય બંને દેશો વચ્ચે લાંબા ગાળાની શાંતિ અને સુરક્ષા વ્યવસ્થા માટેનું માળખું તૈયાર કરવાનો છે.

 આ ચર્ચામાં લેબેનોનના સાર્વભૌમત્વની સંપૂર્ણ પુનઃસ્થાપના, બંને દેશો વચ્ચેની સરહદોનું સ્પષ્ટ નિર્ધારણ અને લેબેનોનમાં માનવતાવાદી રાહત તેમજ પુનર્નિર્માણ માટે નક્કર રસ્તાઓ બનાવવા જેવા અત્યંત મહત્વપૂર્ણ મુદ્દાઓ પર ભાર મૂકવામાં આવશે. આ મંત્રણા સફળ રહેશે તો આ વિસ્તારમાં ચાલી રહેલા લાંબા સંઘર્ષનો અંત આવવાની આશા છે.