નવી દિલ્હી | તા. 27: ચૂંટણી પંચ દ્વારા હાથ ધરવામાં આવતી મતદાર યાદીઓની 'સ્પેશિયલ ઇન્ટેન્સિવ રિવિઝન' (SIR) પ્રક્રિયાને લઈને ચાલી રહેલા લાંબા વિવાદનો સુપ્રીમ કોર્ટે અંત લાવી દીધો છે. સર્વોચ્ચ અદાલતે આ પ્રક્રિયાને સંપૂર્ણપણે માન્ય અને બંધારણીય જાહેર કરી છે. મુખ્ય ન્યાયાધીશ સૂર્યકાંતની અધ્યક્ષતાવાળી બેન્ચે સ્પષ્ટ કર્યું કે મુક્ત અને ન્યાયી ચૂંટણી સુનિશ્ચિત કરવા માટે આ પ્રક્રિયા એક બંધારણીય જરૂરિયાત છે. કોર્ટે એમ પણ કહ્યું કે ચૂંટણી પંચ પોતાની કાનૂની સત્તાઓની મર્યાદામાં રહીને જ આ કાર્યવાહી કરી રહ્યું છે.
ભાજપનો રાહુલ ગાંધી પર વળતો પ્રહાર
સુપ્રીમ કોર્ટના આ નિર્ણય બાદ રાજકીય ગરમાવો વધી ગયો છે. ભારતીય જનતા પાર્ટીએ આ મુદ્દે કોંગ્રેસ નેતા રાહુલ ગાંધીને આડેહાથ લીધા છે. ભાજપના રાષ્ટ્રીય પ્રવક્તા પ્રદીપ ભંડારીએ સોશિયલ મીડિયા પર આક્રમક ટિપ્પણી કરતા કહ્યું કે, કોર્ટના આ નિર્ણયે રાહુલ ગાંધી અને કોંગ્રેસનો અસલી ચહેરો ખુલ્લો પાડી દીધો છે. તેમણે આરોપ લગાવ્યો કે, કોંગ્રેસ શરૂઆતથી જ SIR પ્રક્રિયાનો વિરોધ કરતી હતી, કારણ કે તેમનો ઉદ્દેશ્ય ભારતના અસલી મતદારોના હિતને બદલે ગેરકાયદેસર ઘૂસણખોરોને પ્રોત્સાહન આપવાનો હતો. ભાજપે આ પ્રવૃત્તિને 'રાષ્ટ્રવિરોધી કૃત્ય' તરીકે ગણાવીને કોંગ્રેસ પર તીખા પ્રહારો કર્યા છે.
શું છે સમગ્ર વિવાદનું મૂળ?
બિહાર સહિતના રાજ્યોમાં SIR પ્રક્રિયાને પડકારતી ઘણી અરજીઓ દાખલ કરવામાં આવી હતી. જેમાં એસોસિએશન ફોર ડેમોક્રેટિક રિફોર્મ્સ (ADR) જેવી સંસ્થાઓનો પણ સમાવેશ થતો હતો. અરજદારોની દલીલ હતી કે ચૂંટણી પંચ પાસે આટલા મોટા પાયે મતદાર યાદીની વિશેષ સમીક્ષા કરવાની સત્તા નથી. પરંતુ સુપ્રીમ કોર્ટે આ તમામ દલીલોને ફગાવી દઈને ચૂંટણી પંચના પક્ષમાં નિર્ણય સંભળાવ્યો છે.
આ નિર્ણય બાદ હવે દેશના ૧૬ રાજ્યો અને ૩ કેન્દ્રશાસિત પ્રદેશોમાં SIR પ્રક્રિયાને આગળ વધારવાનો માર્ગ મોકળો થયો છે. ચૂંટણી પંચે પણ આ અંગે અધિકૃત જાહેરનામું બહાર પાડી દીધું છે. આગામી સમયમાં જ્યારે દેશમાં ચૂંટણીઓનો માહોલ જામી રહ્યો છે, ત્યારે આ ચુકાદો ભારતીય રાજકારણમાં પારદર્શિતા અને મતદાર યાદીઓની ચોકસાઈના મુદ્દે એક મહત્વના વળાંક તરીકે જોવામાં આવી રહ્યો છે. કોંગ્રેસ અને ભાજપ વચ્ચે આ મુદ્દે શરૂ થયેલી શાબ્દિક જંગ આગામી દિવસોમાં વધુ ઉગ્ર બનવાની શક્યતા છે.