મુંબઈ :   બોલિવૂડ અભિનેતા આમિર ખાનના ભત્રીજા અને અભિનેતા ઇમરાન ખાનને લઈને એક અત્યંત સનસનાટીભર્યા અને મોટા સમાચાર સામે આવ્યા છે. મુંબઈ પોલીસે અમેરિકી નાગરિક અને OCI (ઓવરસીઝ સિટિઝન ઓફ ઇન્ડિયા) કાર્ડધારક એવા ઇમરાન ખાનને તાત્કાલિક ધોરણે આગામી 28 ઓક્ટોબર સુધીમાં ભારત છોડી દેવા માટે સખત આદેશ અને નોટિસ ફટકારી છે. ગત 10 ઓક્ટોબરના રોજ મુંબઈમાં મુખ્ય ચૂંટણી કમિશનર સામે યોજાયેલા એક વિરોધ પ્રદર્શન દરમિયાન ઇમરાન ખાને હાજરી આપી હતી, જેને લઈને ફોરેનર્સ રિજનલ રજિસ્ટ્રેશન ઓફિસર (FRRO) દ્વારા આ કાર્યવાહી કરવામાં આવી છે. આ ગંભીર મામલે ઇમરાન ખાને બોમ્બે હાઇકોર્ટનો દરવાજો ખટખટાવ્યો છે, જ્યાં સોલિસિટર જનરલ તુષાર મહેતા અને ઇમરાનના વકીલો વચ્ચે રસાકસીભરી દલીલો બાદ આજે હાઇકોર્ટમાં મહત્વનો ફેંસલો આવવાની પૂરી સંભાવના છે.

કોર્ટમાં દાખલ કરવામાં આવેલી અરજીઓ અને દલીલો મુજબ, કેન્દ્ર સરકારની કાર્યવાહીને સમર્થન આપતા એક વકીલે હસ્તક્ષેપ અરજી દાખલ કરી છે જેમાં દાવો કરવામાં આવ્યો છે કે ઇમરાન ખાન એક વિદેશી નાગરિક હોવા છતાં રાષ્ટ્ર વિરોધી શક્તિઓ સાથે જોડાયેલા વિરોધ પ્રદર્શનમાં સામેલ થયા હતા અને પોલીસ કસ્ટડી તેમજ વાનમાંથી બહાર આવતી વખતે સોશિયલ મીડિયા પર વિજયના ચિહ્નો બતાવીને કાયદાની મજાક ઉડાવી હતી. અરજીમાં સવાલ ઉઠાવવામાં આવ્યો છે કે વિદેશી નાગરિક તરીકે ભારતીય કાયદાઓનું પાલન ન કરવું અને વિરોધ પ્રદર્શનમાં ભાગ લેવો એ OCI કાર્ડના નિયમોનું સીધું ઉલ્લંઘન છે, જેના કારણે તેમને દેશ છોડવા માટેનો આદેશ આપવામાં આવ્યો છે.

આ વિવાદ પર સ્પષ્ટતા કરતા ઇમરાન ખાને કોર્ટને જણાવ્યું છે કે તેઓ વર્ષ 2006થી કાયદેસર રીતે OCI તરીકે નોંધાયેલા છે અને ભારતમાં નિયમિતપણે કર ચૂકવતા આવ્યા છે. તેમણે દાવો કર્યો હતો કે વિરોધ પ્રદર્શન આયોજિત કરનાર સંસ્થા સાથે તેમને કોઈ લેવાદેવા નથી અને તેઓ માત્ર જિજ્ઞાસા વશ ઓગસ્ટ ક્રાંતિ મેદાન ખાતે પહોંચ્યા હતા કે વિદ્યાર્થીઓ ત્યાં શું કરી રહ્યા છે. મીડિયા સાથે વાતચીત કરવાને કારણે પોલીસે તેમની અટકાયત કરી હોવાનું જણાવીને તેમણે આ નોટિસને રદ કરવાની માંગ કરી છે. હવે મંગળવારે હાઇકોર્ટના અંતિમ ચુકાદા પર જ સ્પષ્ટ થશે કે ઇમરાન ખાનને રાહત મળશે કે પછી ભારત છોડવું પડશે.