કાઠમંડુ, તા.૦૭: નેપાળમાં હવામાનનો મિજાજ ફરી એકવાર બગડતા દેશના અનેક ભાગોમાં ભારે વરસાદ પડ્યો છે, જેના કારણે સામાન્ય જનજીવન ગંભીર રીતે પ્રભાવિત થયું છે. બુધવારે નેપાળના પશ્ચિમી જિલ્લાઓમાં અનરાધાર વરસી રહેલા પાણીને કારણે જળવિજ્ઞાન અને હવામાન વિભાગ દ્વારા નદીઓમાં અચાનક પૂર આવવાની ગંભીર ચેતવણી જારી કરવામાં આવી છે. અર્ઘાખાંચી, બાંકે અને બરડિયા સહિતના અનેક વિસ્તારોમાં જળસ્તર ભયજનક સપાટી તરફ આગળ વધી રહ્યા છે.

હવામાન વિભાગની પૂર પ્રારંભિક ચેતવણી પ્રણાલીના અહેવાલ મુજબ, અર્ઘાખાંચી જિલ્લાના સિમલપાની વોટર મીટરિંગ સ્ટેશન પર માત્ર ત્રણ કલાકના ટૂંકા ગાળામાં ૮૪.૪ મિમી વરસાદ નોંધાયો છે. આ ભારે વરસાદના કારણે આસપાસના વિસ્તારોની નાની નદીઓમાં અચાનક પૂર આવવાની સંભાવના ખૂબ જ વધી ગઈ છે. દાર્ચુલા, બૈતાડી, બજહાંગ, દોતી, દાદેલધુરા, કૈલાલી અને કંચનપુર સહિતના વિસ્તારોમાં પણ પૂરનું મધ્યમ જોખમ તોળાઈ રહ્યું છે.

આ ઉપરાંત રાષ્ટ્રીય પ્રસારણકર્તાના અહેવાલો મુજબ ચિતવાન, પાલ્પા, નવલપુર, તાનાહુન, ગોરખા અને રૂપંદેહી જેવા ક્ષેત્રોમાં પણ વાવાઝોડા અને ભારે વીજળીના ચમકારા સાથે વરસાદ પડી રહ્યો છે. લુમ્બિની અને સુદુરપશ્ચિમ પ્રાંત તેમજ બાગમતી, ગંડકી અને કરનાલીના પહાડી વિસ્તારોમાં પણ આગામી દિવસોમાં હવામાન ખરાબ રહેવાની પૂરી શક્યતા છે.

નેપાળ માટે આ કુદરતી આપત્તિ ન નવી નથી, કારણ કે દેશ અગાઉના પૂર અને ભૂસ્ખલનની ભયાનક અસરોમાંથી માંડ બહાર આવી રહ્યો છે. ગત સપ્ટેમ્બરમાં થયેલા ભારે વરસાદને કારણે દેશભરમાં ૫૪૨ જેટલી કુદરતી આફતો નોંધાઈ હતી, જેમાં ૩૦૪ ભૂસ્ખલન અને ૮૭ પૂરની ઘટનાઓ સામે સામે આવી હતી. આ તમામ દુર્ઘટનાઓમાં અનેક લોકોએ પોતાના પ્રાણ ગુમાવ્યા હતા અને હજારો પરિવારો બેઘર બન્યા હતા, સાથે જ મોટા પાયે આંતરમાળખાકીય નુકસાન પણ થયું હતું.

હવામાન વિભાગના જણાવ્યા અનુસાર, આગામી શુક્રવાર સુધી હવામાન અસ્થિર રહેશે અને તૂટક તૂટક વરસાદ તથા વાવાઝોડાની સ્થિતિ યથાવત્ રહેશે. શનિવારથી હવામાનમાં ક્રમિક સુધારો થવાની સંભાવના વ્યક્ત કરવામાં આવી છે. જોકે, વર્તમાન સ્થિતિને ધ્યાનમાં રાખીને તંત્ર દ્વારા નદી કિનારાના વિસ્તારોમાં રહેતા લોકોને સુરક્ષિત સ્થળોએ ખસી જવા અને સાવચેતી રાખવાની સૂચના આપવામાં આવી છે.

સરકારી એજન્સીઓ અને આપત્તિ વ્યવસ્થાપન સત્તામંડળ સંભવિત પૂરની સ્થિતિ પર સતત નજર રાખી રહ્યા છે. નાગરિકોની સુરક્ષા માટે એલર્ટ મેસેજ મોકલવામાં આવી રહ્યા છે જેથી કોઈપણ મોટી જાનહાનિ ટાળી શકાય અને રાહત તથા બચાવ કામગીરી તાત્કાલિક ધોરણે હાથ ધરી શકાય.