નવી દિલ્હી :દેશના કરોડો કર્મચારઓને 8માં પગાર પંચને લગતી ભલામણો અંગે વિવિધ સંગઠનો તેમન માંગો સોંપી રહ્યા છે. મેમોરેન્ડમ જમા કરવાની અંતિમ તારીખ 30 એપ્રિલ છે. આ સંદર્ભમાં ભારતીય પ્રતિરક્ષા મજૂર સંઘ (BPMS)એ પગાર, ભથ્થાં અને પગાર માળખામાં મોટા ફેરફારોની માંગણી કરતો એક વિગતવાર મેમોરેન્ડમ રજૂ કર્યો છે.

BPMS માંગ કરે છે કે લઘુત્તમ વેતન દર મહિને રૂપિયા 72,000 કરવામાં આવે. આ માંગને સમર્થન આપવા માટે સંગઠને નક્કર ડેટા રજૂ કર્યા છે. આંકડા અને કાર્યક્રમ અમલીકરણ મંત્રાલય (MoSPI)ના ડેટાને ટાંકીને, BPMS એ જણાવ્યું હતું કે દેશની માથાદીઠ ચોખ્ખી રાષ્ટ્રીય આવક 2016-17 માં રૂપિયા 103,219 હતી, જે વર્ષ 2024-25 માં વધીને રૂપિયા 192,774 થઈ ગઈ છે, જે લગભગ 86.76 ટકાનો વધારો દર્શાવે છે. સંગઠનનો તર્ક છે કે દેશની આવકમાં આટલો વધારો થયો છે તો સરકારી કર્મચારીઓના પગારમાં તે મુજબ વધારો કેમ ન થવો જોઈએ?

હાલની સિસ્ટમ રૂપિયા 18,000 ના લઘુત્તમ પગાર પર આધારિત છે. BPMS ફિટમેન્ટ ફેક્ટર 3 ને બદલે 4 કરવા માંગે છે. આ ગુણકનો હેતુ ફુગાવો, DA અને આવક વૃદ્ધિને સમાવીને તમામ પગાર સ્તરોમાં એકરૂપતા લાવવાનો છે. સરળ શબ્દોમાં કહીએ તો આ તે પરિબળ છે જે નક્કી કરશે કે ૭મા પગાર પંચથી 8મા પગાર પંચ સુધી કેટલો પગાર વધશે.

હાલમાં કર્મચારીઓને દર વર્ષે 3% નો વધારો મળે છે. BPMS 6% સુધી વધારવાની માંગ કરી રહ્યું છે. તર્ક સ્પષ્ટ છે. DA ફુગાવાનો સામનો કરે છે પરંતુ વધારાથી ખરેખર આવકમાં વધારો થાય છે. ખાનગી ક્ષેત્રમાં વધુ સારા પેકેજો ઉપલબ્ધ હોય ત્યારે સરકારી નોકરીઓ તેમનું આકર્ષણ ગુમાવે નહીં તેની ખાતરી કરવા માટે આ જરૂરી છે.

સંગઠને માંગ કરી છે કે પગાર ગણતરીમાં વપરાતા પારિવારીક યુનિટને ત્રણથી વધારીને પાંચ સભ્યો કરવામાં આવે. વાસ્તવમાં એક ભારતીય કર્મચારી ફક્ત તેની પત્ની અને બાળકોની જ નહીં પરંતુ તેના માતાપિતાની પણ સંભાળ રાખે છે. ત્રણ સભ્યોની વ્યાખ્યા વાસ્તવિકતાથી ઘણી દૂર છે 

સરકારે 17 જાન્યુઆરી,2025ના રોજ 8મા પગાર પંચની જાહેરાત કરી હતી. આ પંચ દર 10 વર્ષે રચાય છે. તે મૂળ પગાર, પેન્શન અને ભથ્થાઓમાં ફેરફારની ભલામણ કરે છે. 28 ઓક્ટોબર-2025ના રોજ, કેન્દ્રીય મંત્રીમંડળે તેની સંદર્ભ શરતોને મંજૂરી આપી હતી.

ન્યાયાધીશ રંજના પ્રકાશ દેસાઈ તેના અધ્યક્ષ છે. કમિશને તેની રચનાના 18 મહિનાની અંદર તેનો અહેવાલ રજૂ કરવાનો રહેશે. મેમોરેન્ડમ સબમિટ કરવાની અંતિમ તારીખ 30 એપ્રિલ, 2026 છે. ત્યારબાદ કમિશન તમામ સૂચનોની સમીક્ષા કરશે અને તેની ભલામણો તૈયાર કરશે